QR DSM Ýkraınadan dári jetkizýshilermen kelisimsharttardyń kúshin joıady
Bul týraly vedomstvo basshysy Ajar Ǵınııat Májilistiń jalpy otyrysynda depýtat saýalyna bergen jaýabynda aıtty.
«Bizge ómiri udaıy dári iship turýǵa táýeldi adamdar júginip jatyr. Densaýlyq saqtaý mınıstrligi Ýkraınadan dári kelý boıynsha problemalarǵa tap kelip otyr. Bul elden 25 túrli dári-dármek satyp alynady. Taǵy bir másele bar. Ózimizdegi dári óndirisi keıbir quramdyq bólshekter men logıstıka boıynsha ımportqa táýeldi. Osynyń saldarynan dáriniń ózindik quny artyp otyr. Medıtsna mekemeleri dári-dármek pen medıtsınalyq buıymdar satyp alý kezinde shprıtster, katetrlar men ózge de alǵashqy kezekte qajetti taýarlar tapshylyǵyna tap bolyp otyr. Al Úkimet uzaq merzimge jetetin qorymyz bar deıdi. Keı óńirlerde tipti «SQ-Farmatsııanyń» qoımalary da joq bolsa, qor qalaı jetkilikti bolady? Naýqastarǵa dári-dármekti qalaısha úzdiksiz jetkiz bekshisizder»,- dedi Májilis depýtaty Zarına Kamasova.
Densaýlyq saqtaý mnıstri Ajar Ǵınııat bul problema vedomstvonyń udaıy nazarynda ekenin aıtty.
«Geosaıası ahýal óte kúrdeli bolyp tur. Bıylǵa qajet dári men medıtsınalyq buıymdardy satyp alý boıynsha byltyr konkýrs ótkizgen bolatynbyz. Qajet dárilerdiń 94 paıyzyn satyp aldyq. Búginde ol dárilerdiń 50 paıyzy «SQ-Farmatsııa» qoımalary men habtaryna jetkizilgen. Jyl aıaǵyna deıin naýqastarǵa qajet dári bar. Ýkraınaǵa kelsek, bul kólemniń 1,6%-y nemese dárilik preparattardyń 25 túri osy elden ákelinedi. Jyl basynan beri sonyń 40-tan 70 paıyzyna deıin jetkizdik. Búginde zaýyttar jabyq tur. Sondyqtan birjaqty negizde kelisimsharttardy toqtatamyz. Qalǵan kólem boıynsha qaıtadan konkýrs jarııalaımyz. Bul jumystardy 1 shildege deıin aıaqtap, dárilik zattarmen qamtamsyz etemiz», -dedi vedomstvo basshysy.
Eske salsaq, búgin Premer-Mınıstrdiń orynbasary Eraly Toǵjanov Májilis depýtattaryna ınflıatsııany tejeý baǵytyndaǵy sharalar týraly málimet berdi.
Onyń málimeti boıynsha, bıyl zeınetaqy men járdemaqyny ındeksteýge qosymsha 111 mlrd teńge bólinedi.
