QR DSM koronavırýs ınfektsııasyn juqtyrǵan Kamaljan Nadyrovtyń jaǵdaıyn baıandady

NUR-SULTAN. QazAqparat - Koronavırýs ınfektsııasyn juqtyrǵan burynǵy vıtse-mınıstr Kamaljan Nadyrovta aýrý jeńil formada ótip jatyr. Bul týraly QR Densaýlyq saqtaý mınıstrliginiń resmı ókili Dıas Ahmetshárip aıtyp berdi, dep habarlaıdy QazAqparat tilshisi.

«Keshe Kamaljan Talǵatuly Úkimet sheshimimen vıtse-mınıstr laýazymynan bosatyldy jáne Almaty qalasynyń basqarma basshysy qyzmetine kirisýi kerek edi. Ókinishke qaraı, keshke onyń densaýlyǵy syr berip, koronavırýske analız tapsyrdy. Analız oń nátıje kórsetip, K. Nadyrov Nur-Sultan qalasynyń ınfektsııalyq stantsıonaryna jatqyzyldy. Qazir jaǵdaıy jaman emes, aýrý jeńil formada ótýde. Eki aptada emdelip shyǵyp, jańa qyzmetine kirisedi dep úmittenemiz», - dedi Dıas Ahmetshárip QazAqparat tilshisine bergen jaýabynda.

Onyń aıtýynsha, K. Nadyrovpen jaqyn jáne yqtımal baılanysta bolǵandar anyqtalyp jatyr. Epıdemıologııalyq tekserý bastaldy.

«Sońǵy kúnderi Kamaljan Nadyrov mınıstrdiń tapsyrmasymen Almaty oblysynda boldy. Almaty qalasynda emhanadan aýrý oshaǵy shyǵyp, dárigerlerdiń arasynda túsinispeýshilik týǵanda da, K. Nadyrov barǵan edi. Árıne, qorǵanys kıimin kıip, barlyq talaptardy saqtady. Degenmen, aýrýdyń kimnen, qaı jerden juqqanyn anyqtaýymyz qajet. Ol kisi qazir qaı kúni qaıda bolǵanyn, kimmen kezdeskenin tizbektep jazyp otyr. Baılanysta bolǵan barlyq adamdarǵa PTR arqyly dıagnostıka jasalady», - dedi resmı ókil.

Aıta ketsek, Densaýlyq saqtaý vıtse-mınıstri bolǵan Kamaljan Nadyrov koronavırýs ınfektsııasyn juqtyryp, aýrýhanaǵa jatqyzyldy.

Otstavkaǵa ketý týraly ótinish bildirgen Almaty Qoǵamdyq densaýlyq saqtaý basqarmasynyń basshysy Tileýhan Ábildaev ázirge óz qyzmetin jalǵastyra turady.