QR DSM komıtetiniń burynǵy basshysy sheteldikten para aldy dep kúdiktelýde

ASTANA. QazAqparat - QR Densaýlyq saqtaý mınıstrliginiń medıtsınalyq jáne farmatsevtıkalyq qyzmetti baqylaý komıtetiniń burynǵy tóraǵasy Nazarbek Beısen sheteldiń kásipkerinen para aldy degen kúdikpen ustalǵan bolatyn, dep xabarlaıdy QazAqparat tilshisi.

QR Memlekettik qyzmet isteri jáne sybaılas jemqorlyqqa qarsy kúres agenttigi resmı ókili Nurlan Jaxınniń aıtýynsha, Ázerbaıjannyń kásipkeri Qazaqstanǵa «Tızabrı» preparatyn ákelý úshin N.Beısenge 100 myń AQSh dollar kóleminde para berdim dep otyr. «Alaıda Beısen óz ýádesin oryndamaǵan. Sodan para bergen kásipker sybaılas jemqorlyqqa qarsy ulttyq bıýroǵa aryz túsirdi. Qazirgi kezde tergeý amaldary júrgizilip jatyr. Kúdikti úıqamaqqa alyndy», - dedi N.Jaxın Astanada ótken baspasóz máslıxatynda.

Aıta keteıik, búgin agenttik ókilderi paramen ustalǵan birneshe sheneýniktiń vıdeosyn jarııalady. Olardyń ishinde QR Syrtqy ister mınıstrliginiń burynǵy jaýapty xatshysy,  sondaı-aq, «Kedentransservıstiń» AQ vıtse-prezıdenti bar.  Budan bólek, Jambyl oblysynda túrme bastyǵynyń orynbasary alǵan paranyń vıdeosy kórsetildi.