QR DSM: Qazaqstandyqtar qant pen tuzdy qalyptan tys kóp tutynady

ASTANA. QazAqparat - Qazaqstandyqtardyń qant pen tuzdy mólsherden tys kóp tutynýy salamatty ómir saltyn buzyp, túrli aýrýlardyń týyndaýyna sebep bolyp otyr. Bul týraly OKQ-da ótken baspasóz máslıahatynda QR Densaýlyq saqtaý mınıstrligi «Densaýlyq saqtaýdy damytý» Respýblıkalyq ortalyǵynyń bas dırektory Aınur Aıyphanova aıtyp berdi, dep habarlaıdy «QazAqparat» HAA tilshisi.

«Halyqaralyq densaýlyq saqtaý uıymynyń kórsetkishine súıensek, bizde tuz ben transmaılardy, qantty tutyný boıynsha sońǵy jyldary eshqandaı oń ózgeris baıqalmaıdy. Mysaly tuzdy paıdalaný jaǵynan HDDU-nyń erejesi boıynsha táýligine 5 grammnan aspaýy kerek. Al bizdiń barlyq oblystarymyzda halyqtyń tuzdy paıdalaný mólsheri 16 paıyzǵa jetip otyr. Demek, úsh-tórt ese kóp. Ol salamatty ómir saltyn saqtaý erejesine saı kelmeıdi. Qantty tutyný kúnine 25 grammnan aspaýy kerek. Al bizde kúnine 100 gramdaı, al balalar 150-160 gram qant tutynady», - deıdi ol.

Aınur Aıyphanova keltirgen derekterge súıensek, elimizdegi 8-10 jas aralyǵyndaǵy árbir besinshi bala artyq salmaqtan zardap shegip otyr.

«Adamdar bala kezinen bastap durys tamaqtanbaı, fızıkalyq belsendilik tanytpaı, bala kezinen artyq salmaqtyń keselinen túrli aýrýlarǵa dýshar bolady. Bizdiń búgingi maqsatymyz - halyqqa óz densaýlyǵymyz ózimizdiń qolymyzda ekenin barynsha túsindirý. QR bıyldan bastap qabyldanǵan Qoǵamdyq densaýlyq saqtaý qyzmeti osy maqsatty kózdep, barlyq óńirlerde Qoǵamdyq densaýlyq saqtaý departamentterin qurdy. Buryn tek qana ınfektsııalyq aýrýlardy qadaǵalaǵan komıtettiń qyzmeti bes esege artty. ıAǵnı, olar endi sozylmaly aýrýlarǵa da kóńil bóledi», - deıdi ol.