QR DSM elimizde qandaı azyq-túlik jıi talapqa saı bolmaı shyǵatynyn málimdedi

ALMATY. QazAqparat - QR DSM Taýarlar men qyzmetter qaýipsizdigi jáne sapasyn baqylaý komıtetiniń tóraıymy Lıýdmıla Bıýrabekova azyq-túlikterde anyqtalǵan buzýshylyqtar týraly aıtty, dep habarlaıdy QazAqparat tilshisi.

Lıýdmıla Bıýrabekovanyń aıtýynsha, bul komıtet osy jyldyń sáýir aıynda Qazaqstannyń Tuńǵysh Prezıdenti Nursultan Nazarbaevtyń tapsyrmasyna sáıkes qurylǵan. Komıtet mindetteriniń biri - tamaq ónimderiniń qaýipsizdigi boıynsha jumys.

«Kún saıyn bizdiń barlyq aýmaqtyq departament qyzmetkerleri azyq-túlik sapasyna zertteýler júrgizedi. Ónimderge qoıylatyn talaptarǵa sáıkes kelmeıtin ónimderdi iriktep, taldaý jasaıdy. Aǵymdaǵy jyldyń osy kezeńinde tamaq ónimderi men azyq-túlikke jatpaıtyn ónimderdiń 43 myń synamasy iriktelip alyndy jáne 19,6% jaǵdaıda tehnıkalyq reglamentter men gıgıenalyq normatıvterdiń talaptaryna sáıkes kelmeýi anyqtaldy. Kóptegen buzýshylyqtar tańbalaý erejesinde anyqtaldy - 68,3%, qaýipsizdik talaptaryn saqtamaý - 12,4%, málimdelgen qasıetterge nemese fızıka-hımııalyq parametrlerge sáıkes kelmeý - 6,3% », - dedi ol.

Onyń málimeti boıynsha, aǵymdaǵy jyly anyqtalǵan buzýshylyqtarǵa 56 mln. teńgeden astam aıyppul salyndy, 38 myń tonna jaramsyz taýar aınalymnan alyndy.

«Sáıkessizdikter men jalǵan ónimderdiń kópshiligi sút jáne maı ónimderinde kezdesedi. Tabıǵı ónimder dep kórsetedi de, alaıda quramynda ósimdik maıy bar taǵamdardy satady», - dep tolyqtyrdy Lıýdmıla Bıýrabekova.

Sondaı-aq, ol bizdiń elde kontrafaktilik ónimder úshin qylmystyq jaýapkershilik qarastyrylmaǵanyn, biraq ákimshilik jaza qoldanylatynyn aıtty.

Esterińizge salaıyq, Almatyda «Alımentarıýs kodeksi» komıssııasynyń Eýropa boıynsha úılestirý komıtetiniń 31-shi sessııasy bastaldy. Oǵan Eýropanyń 38 elinen, AQSh, Afrıka jáne Azııadan eki júzge jýyq delegat qatysýda.