QR DSM-de sybaılas jemqorlyqqa áser etetin jaǵdaılarǵa taldaý júrgiziledi
Birinshi vıtse-mınıstr Marat Shoranovtyń tóraǵalyǵymen ótken jıynǵa mınıstrliktiń barlyq qurylymdyq bólimsheleriniń basshylary qatysty, dep habarlaıdy QazAqparat QR Densaýlyq saqtaý mınıstrliginiń baspasóz qyzmetiniń málimetterine silteme jasap.
M.Shoranov atap ótkendeı, densaýlyq saqtaýdy damytý - memlekettiń áleýmettik saıasatynyń negizgi basymdyqtarynyń biri. Halyqtyń ál-aýqatyn jaqsartýdyń biri retinde medıtsına qyzmetteriniń qoljetimdiligi men sapasyna erekshe nazar aýdarý mańyzdy.
«Pandemııa búkil densaýlyq saqtaý júıesiniń kúshin synaýda jáne bizdiń qyzmetimizge aıtarlyqtaı túzetýler engizdi. Jumys barysyndaǵy keıbir protsesterdiń jetilmegendigin, solardyń ishinde sybaılas jemqorlyq komponentterin, jyldar boıy jınaqtalǵan problemalardy ashty», - dedi birinshi vıtse-mınıstr.
Aǵymdaǵy jyldyń 2 qazanynda Densaýlyq saqtaý júıesindegi sybaılas jemqorlyqqa qarsy is-qımyl máseleleri boıynsha mınıstrliktiń Sybaılas jemqorlyqqa qarsy kúres qyzmetimen birlesken otyrysy barysynda Densaýlyq saqtaý mınıstri Alekseı Tsoı departament júrgizip jatqan jumystar týraly aıtyp, sybaılas jemqorlyq táýekelderin anyqtaý jáne joıý boıynsha syndarly yntymaqtastyqqa daıyn ekenin bildirgen edi. Sondaı-aq, mınıstr ortalyq apparattaǵy sybaılas jemqorlyq táýekelderine syrtqy taldaý júrgizýdi bastaǵanyn aıtqan bolatyn. Sonymen birge Agenttiktiń tóraǵasy Alık Shpekbaev bul bastamany qoldaǵan. Aldaǵy ýaqytta osyndaı jumystar mınıstrliktiń jańadan qurylǵan komıtetteri men aýmaqtyq departamentterinde júrgiziledi.
«Aǵymdaǵy jyldyń 16 qarashasynda Birlesken buıryqqa qol qoıyldy, sonyń aıasynda jumys toby mınıstrliktiń uıymdastyrýshylyq-basqarýshylyq qyzmeti men normatıvtik quqyqtyq aktilerindegi 2020 jylǵy 17 qarashadan 20 jeltoqsanǵa deıin sybaılas jemqorlyq táýekelderine taldaý júrgizedi», - dedi M.Shoranov.
Sonymen birge, Sybaılas jemqorlyqqa qarsy qyzmet «SK-Farmatsııa» jáne áleýmettik medıtsınalyq saqtandyrý qorynyń sybaılas jemqorlyq táýekelderine syrtqy taldaý júrgizdi. Qazir kemshilikterdi joıý jumystary jalǵasýda.
«Mınıstrlik densaýlyq saqtaý júıesindegi sybaılas jemqorlyq faktilerin aldyn alý úshin ashyqtyq jáne obektıvtilikti basshylyqqa alady. Sonymen qatar, biz jańa birlesken jobalardy júzege asyrýǵa daıynbyz», - dedi birinshi vıtse-mınıstr.
Jalpy, keńeske qatysýshylar Densaýlyq saqtaý mınıstrliginiń qyzmetimen jáne qurylymdyq bólimsheleriniń basshylarymen tanysyp, syrtqy taldaý júrgizýdiń uıymdastyrýshylyq máselelerin talqylady.