QR DSM-de ana men sábı ólim-jitimin jáne qan aınalym júıesinen bolatyn aýrýlardan kóz jumý faktilerin azaıtý máseleleri qaraldy
ASTANA. 18 mamyr. QazAqparat /Gúlmıra Álıakparova/ - 18 mamyrda QR Densaýlyq saqtaý mınıstrliginde ana men sábı ólim-jitimin jáne qan aınalym júıesinen bolatyn aýrýlardan kóz jumý faktilerin azaıtý boıynsha shuǵyl is-sharalar qabyldaý jónindegi respýblıkalyq shtabtyń otyrysy ótti.
Keńes barysynda 2011 jyldyń birinshi toqsanynyń qorytyndysy boıynsha Qazaqstan Respýblıkasyndaǵy ana men sábı ólimi máselesiniń jaǵdaıy, QR-da neonataldy hırýrgııany damytý baǵdarlamasynyń jobasy, mı- qan aınalym júıesiniń jedel buzylýy jáne taǵy basqa máseleler qaraldy.
Aǵymdaǵy jyldyń birinshi toqsanynda ana óliminiń kórsetkishi ótken jyldyń sáıkes kezeńine qaraǵanda - 39, sábı ólimi 15 paıyzǵa tómendedi. Ótken jylmen salystyrǵanda júktilik kezinde bolǵan aýrýlardan kóz jumý faktileri 2 esege derlik azaıdy. Al jasandy túsikten keıingi asqynýlardan qaıtys bolý oqıǵalary tirkelgen joq. Sondaı-aq, 2010 jyldyń atalmysh kezeńine qaraǵanda, áıelderdiń júktilik kezinde qaza bolýy oqıǵalarynyń arasynda akýsherlik qan ketýden bolǵan jaǵdaılar 2 esege deıin azaıdy. Onymen birge, QR DSM-nyń atqarǵan sharalarynyń nátıjesinde áıelderdiń pnevmonııadan kóz jumýy 2 esege tómendedi.
Júrek bulshyq etiniń jansyzdanýy men mı- qan aınalymy júıesiniń buzylýynan bolatyn ólimderdi azaıtý maqsatynda Astana jáne Almaty qalalary boıynsha Densaýlyq saqtaý basqarmalarynyń basshylaryna naýqastarǵa medıtsıalyq kómekterdi shuǵyl túrde kórsetip otyrýǵa tapsyrma berildi. Sonymen birge, óńirlik ınsýlttik ortalyqtar qurý máselesi qaraldy.
