QR DSM dárigerdiń naýqasty tepkileý oqıǵasyna qatysty óz ustanymyn bildirdi

ASTANA. QazAqparat - QR Densaýlyq saqtaý vıtse-mınıstri Alekseı Tsoı temirjol aýrýxanasynda bolǵan jaǵdaıǵa qatysty pikir bildirdi, dep xabarlaıdy QazAqparat tilshisi.

«Endi, quziretti organdar óz baǵasyn bere jatar. Degenmen, dárigerdiń etıkasy boıynsha adamǵa kúsh kórsetýge tyıym salynǵan. Árıne, bir sebepter boldy. Ony quqyq qorǵaýshylar anyqtaıdy. Sotta da eki jaq óz ustanymyn aıtatyn shyǵar», - dedi A.Tsoı jýrnalısterge bergen suxbatynda.

Onyń aıtýynsha, tóbeles kezinde kim qandaı kóńil-kúıde boldy, óz áreketine jaýap berdi me, joq pa, osynyń bárin jan-jaqty qarastyrý qajet.

«Ashyǵyn aıtý kerek, keı kezde patsıentter qatty aýyryp keledi de, ursyp sóıleıdi. Mas kúıinde keletinder de bolady. Sodan neshe túrli jaǵdaılar týyndaıdy. Endi, bul jolǵy jaǵdaı solaı aıaqtaldy. Tekseris bastaldy. Jaqyn arada naqty sebepterin anyqtap jarııalaımyz», - dep atap kórsetti A.Tsoı.

Aıta keteıik, Astanadaǵy ortalyq temirjol aýrýhanasy medıtsınalyq qyzmetkerdiń naýqasty sabaý oqıǵasyn rastady.

Bas dáriger Sergeı Demochkınniń aıtýynsha, naýqas adamdy 26 jastaǵy kezekshi terapevt tepkilegen.

«Soqqyǵa jyǵylǵan naýqas aýrýhanaǵa 2 qazanǵa qaraǵan túni bas jaraqatymen mas kúıinde jetkizilgen. Naýqas ózin dóreki ustap, medıtsınalyq qyzmetkerlerdi balaǵattaǵan. Ony kezekshi neırohırýrg teksergen jáne jarasyn tańyp, úıine jibergen. Biraq, aýrýhanaǵa qaıtyp kelip, joǵalǵan telefonyn taýyp berýdi talap etken. Sol sátte naýqas aýrýhananyń kezekshi terapevtine tıisip, jaqyn týystaryn balaǵattaǵan jáne bokstan sport sheberi ekenin aıtyp, jekpe-jekke shaqyrǵan. Bir ret urǵanda dáriger esh jaýap qaıtarmaǵan, al ekinshi ret urǵanda naýqasty keýdesinen ıtergen. Jerge qulaǵan naýqasty ashýmen tepken», - dedi S. Demochkın.

Osyǵan deıin naýqasty soqqyǵa jyqqan dárigerdiń jumystan bosatylǵandyǵy habarlandy. Sondaı-aq oǵan qatysty qylmystyq is qozǵaldy.