QR DSÁDM óńirlerdegi medıtsınalyq mekemelerdiń qyzylshaǵa qarsy vaktsınalaýǵa daıyndyǵyn tekserýde

ASTANA. QazAqparat - QR Densaýlyq saqtaý jáne áleýmettik damý vıtse-mınıstri Alekseı Tsoı Aqmola, Batys Qazaqstan, Pavlodar oblystaryna barǵan jumys saparynda Qazaqstan Respýblıkasyndaǵy qyzylshaǵa qarsy qosymsha ımmýndaý naýqanyn ótkizýge arnalǵan áleýmettik jumyldyrý men aqparattyq jumystar josparyn júzege asyrý sharalaryn, sonymen qatar, medıtsınalyq uıymdardyń vaktsınalaýdy ótkizýge daıyndyǵyn tekserdi, dep habarlady QR Premer-Mınıstriniń saıty mınıstrliktiń baspasóz qyzmetine silteme jasap.

«Jospardy júzege asyrý sharalary aıasynda Aqmola, Batys Qazaqstan, Pavlodar oblystarynyń medıtsınalyq uıymdarynda jurtshylyqqa qyzylshaǵa qarsy vaktsınalaý qajettiligi týraly túsindirý jumystary júrgizilýde. Qosymsha ımmýndaýǵa jatatyn maqsatty toptardyń (15-19 jas aralyǵyndaǵy jasóspirimder) jáne vaktsınalaýǵa medıtsınalyq qarsy kórsetilimi bar adamdardyń quramy anyqtalýda. Egý brıgadalary jasaqtalyp, medıtsınalyq qyzmetkerlerdi daıyndaý boıynsha trenıngter ótkizilýde, sonymen qatar, medıtsınalyq uıymdardyń vaktsınany saqtaý men tasymaldaý sharttaryn qadaǵalaý sharalary, ǵımarattardyń vaktsınalaýdy ótkizýge daıyndyǵy tekserilýde», - delingen vedomstvo málimdemesinde.

Respýblıkanyń barlyq aımaqtarynda dál osyndaı jumystar júrgizilip keledi. Oblys ákimderi orynbasarlarynyń basshylyǵymen ótetin qyzylshaǵa qarsy qosymsha ımmýndaý sharalaryn úılestirý maqsatynda shtabtar quryldy. Sondaı-aq, DSÁDM málimetinshe, aǵymdaǵy jyldyń 7 qyrkúıeginen bastap Astanada medıtsınalyq qyzmetkerlerdi, medıtsınalyq JOO-nyń professorlyq-oqytýshylyq quramyn, Astana, Almaty qalalary men oblystyq densaýlyq saqtaý basqarmalarynyń jaýapty mamandaryn qyzylshaǵa qarsy qosymsha ımmýndaýdy júrgizýge daıyndaý boıynsha semınarlar ótkizilýde. Oqý aıaqtalǵan soń joǵaryda atalǵan mamandar aımaqtarda trenıngter ótkizetin bolady. Árbir egilýshi adam aldaǵy egý týraly habardar bolady. Ol nemese onyń ata-anasy (zańdy ókili) dárigerge shaqyrtylyp, oǵan profılaktıkalyq maqsattaǵy egý týraly tolyq ári shynaıy aqparat beriledi. Sonymen qatar, ımmýndaýdan keıin týyndaıtyn yqtımal jaǵymsyz jaǵdaılar men reaktsııalar, vaktsınalaýdan bas tartýdyń saldary týraly aqparat jetkiziledi. Vedomstvoda málim etkendeı, profılaktıkalyq egý jumystary tek bekitilgen forma boıynsha aqparattandyrylǵan erikti kelisim negizinde ǵana júrgiziledi. Qyzylshaǵa qarsy sertıfıkattalǵan vaktsınanyń qoldaný qaýipsizdigi Dúnıejúzilik densaýlyq uıymymen bekitilgen. Esterińizge sala keteıik, halyqty qyzylshaǵa qarsy qosymsha ımmýndaý jumysy 2015 jyldyń 1 qazanynda jańǵyrtylady.