QR DSÁDM-de elimizdiń Memlekettik rámizderi kúnine arnalǵan saltanatty jıyn ótti
Búgin QR Densaýlyq saqtaý jáne áleýmettik damý mınıstrliginde Qazaqstannyń memlekettik eltańbasy avtorlarynyń biri Jandarbek Málibekovtyń qatysýymen Memlekettik rámizderi kúnine arnalǵan saltanatty jıyn ótti.
Sharanyń maqsaty - azamattyq jaýapkershilik pen otanshyldyqqa tárbıeleý, Otanǵa degen mahabbatty, QR memlekettik rámizderine degen qurmetti qalyptastyrý, sonymen qatar, onyń máni men mańyzdylyǵyn túsindirý bolyp tabylady.
QR Densaýlyq saqtaý jáne áleýmettik damý mınıstrliginiń Jaýapty hatshysy Aıda Qurmanǵalıeva memlekettik rámizderdi qurmettep, oǵan zor kóńil bóletin eldiń damý áleýeti óte joǵary bolatynyn, sonymen qatar, onyń otanshyldyq pen el birligine súıene otyryp, mańyzdy strategııalyq mindetterge qol jetkizetinin atap aıtty.
«Memlekettik rámizderge qurmetpen qaraıtyn adam óz eliniń tarıhyna, memleketimizdiń qazirgi jaǵdaıy men bolashaǵyna osyndaı sezimmen qaraıdy. Árbir qazaqstandyq eltańba men jalaýdyń janynan maqtanyshpen ótken jaǵdaıda ǵana qazaqstandyq patrıotızmniń shynaıylyǵy týraly aıtýǵa bolady», - dedi Aıda Qurmanǵalıeva.
Jandarbek Málibekov qatysýshylarǵa eltańbany jasaýdyń tarıhyn áńgimelep, onyń kompozıtsııalyq qurylymynyń mánin tolyqqandy túsindirip berdi.
«Táýelsizdik - Qazaqstan halqynyń eń basty jetistigi. Búginde biz egemendi elmiz. Basty maqsatymyz - beıbitshilik pen kelisimdi saqtap, týǵan tilimiz ben dástúrlerimizdi damytý», - dedi ol QR DSÁDM ujymyna arnalǵan sózinde.
Jıyn sońynda Aıda Qurmanǵalıeva eltańba avtoryna saltanatty jıynǵa qatysqany úshin jáne Qazaqstannyń memlekettik rámizderiniń birin jasaý barysyndaǵy qyzyqty jaǵdaılardy baıandaǵanyna ujym atynan úlken alǵys bildirdi.