QR DSÁDM-de áleýmettik-eńbek salasynyń 2016 jylǵy 1 toqsanyndaǵy qyzmeti qorytyndylandy
Sharaǵa QR DSÁDM jaýapty hatshysy, vıtse-mınıstrler, komıtet tóraǵalary, mınıstrliktiń qurylymdyq bólimsheleriniń jáne vedomstvoǵa baǵynysty uıymdardyń basshylary, beınebaılanys rejıminde - oblys, Astana, Almaty qalalary ákimderiniń orynbasarlary, oblystyq jumyspen qamtýdy úılestirý, áleýmettik baǵdarlamalar basqarmalary basshylary, sondaı-aq QR DSÁDM eńbek, áleýmettik qorǵaý jáne kóshi-qon komıteti departamentteriniń dırektorlary qatysty.
«Jumyspen qamtý 2020 jol kartasy» baǵdarlamasyn (ári qaraı - «JQJK 2020») iske asyrý sharalary boıynsha QR DSÁDM Halyqty jumyspen qamtý departamentiniń dırektory Baljan Shamenova sóz sóıledi.
«2016 jyly «JQJK 2020» baǵdarlamasyna respýblıkalyq bıýdjetten 100,6 mlrd. teńge bólindi. 2016 jylǵy 1 sáýirdegi málimetterge saı, baǵdarlamaǵa qatysý máselesi boıynsha 33,2 myń adam habarlasty, onyń ishinde jumyssyzdar sany 25854 (78,3%), ózin ózi jumysen qamtyǵandar - 6929 adam (21%), 244 (0,7%) adam - ishinara jumyspen qamtylǵan jaldamaly qyzmetkerler.
2016 jylǵy 1 toqsanda baǵdarlamany iske asyrý aıasynda 34,2 myń adam jumysqa ornalastyryldy. Jumyspen qamtylǵandar sanynyń eń joǵary kórsetkishi Ońtústik Qazaqstan oblysynda - 13,8 myń adam, Qyzylorda oblysynda - 2,5 myń adam, Almaty qalasynda - 2,4 myń adam boldy», - dep habarlady ol.
Jumyspen qamtylǵan turǵyndardy jınaqtaýshy zeınetaqy júıesimen (ári qaraı - JZJ) qamtý týraly QR DSÁDM Áleýmettik qamsyzdandyrý men áleýmettik saqtandyrý departamenti dırektorynyń orynbasary Azamat Ómirtaev málimdedi.
Ol QR Zeınetaqy júıesin ári qaraı jetildirý tujyrymdamasyn iske asyrý aıasynda 2030 jylǵa qaraı jumys isteıtin turǵyndardy jınaqtaýshy zeınetaqy júıesimen qamtýdy 80%-ǵa jetkizý josparlanyp otyrǵanyn eske saldy.
2015 jyldyń qorytyndysy boıynsha jumys isteıtin turǵyndardy jınaqtaýshy zeınetaqy júıesimen qamtý 70,4%-dy (8 mln. 623,8 myń jumyspen qamtylǵan turǵyndarǵa shaqqanda 6 mln. 68,3 myń belsendi salymshylar) qurap otyr. Ótken jyly JZJ belsendi qatysýshylarynyń sany 50 myń adamǵa ulǵaıdy.
«2016 jylǵy 1 sáýirdegi málimetterge saı, BJZQ-daǵy zeınetaqy jınaqtaý somasy 6 trln. 59 mlrd. teńge nemese ІJÓ-niń 14%-ynan astamyn qurap otyr», - dedi Azamat Ómirtaev.
Alqa májilisiniń qorytyndysy boıynsha Tamara Dúısenova «JQJK 2020» baǵdarlamasynyń aıasynda azamattardy jumyspen qamtýdyń belsendi sharalarymen qamtý boıynsha jumysty jandandyrýdy tapsyrdy, dep habarlaıdy QR DSÁDM baspasóz qyzmeti.
