QR DSÁDM basshysy ıÝNEIDS atqarýshy dırektory Mıshel Sıdıbege QHA medalin tapsyrdy

ASTANA. QazAqparat - Búgin Astanada TMD qatysýshy memleketteriniń densaýlyq saqtaý salasyndaǵy yntymaqtastyǵy boıynsha XXVI otyrysynyń ashylýy kezinde QR Densaýlyq saqtaý jáne áleýmettik damý mınıstri Tamara Dúısenova ıÝNEIDS atqarýshy dırektory Mıshel Sıdıbege Qazaqstan halqy Assambleıasynyń 20 jyldyǵyna arnalǵan medaldi tapsyrdy.

Sondaı-aq arnaıy ókil Gaık Nıkogosıan arqyly dál osyndaı tósbelgini DDSU Eýropa bıýrosynyń aımaqtyq dırektory Jýjanna Jakabqa tabystaýdy ótindi.

Bul týraly QR DSÁDM baspasóz qyzmeti habarlady.

 «Bıylǵy jyly Qazaqstan táýelsizdigine 25 jyl tolady. Ótken jyly Qazaqstan halqy Assambleıasynyń 20 jyldyǵy atalyp ótildi. Bizdiń elde qurylǵan jáne elimizdiń Prezıdenti basqaratyn QHA qoǵamdyǵy turaqtylyqty jáne elimizde ómir súrip jatqan barlyq etnostardyń ózara is-qımylyn qamtamasyz etip otyrǵan uıymdardyń biri», - dedi T.Dúısenova marapattardy tapsyrý barysynda.  

QR DSÁDM basshysy ıÝNEIDS-pen odan ári yntymaqtastyqqa senimin bildirdi.

Mınıstr AITV/JITS-tiń taralýy boıynsha eskertýge baǵyttalǵan ortaq sharalardy júzege asyrý barysynda Qazaqstanǵa kórsetken kómek sharalary úshin ıÝNEIDS ókilderine, sonymen birge, densaýlyq saqtaý máseleleri jóninde konsýltatsııalyq kómegi úshin DDSU Eýropalyq bıýrosyna alǵys bildirdi.