QR DSÁD vıtse-mınıstri S.Qaıyrbekova óńirler turǵyndaryn beınekonferentsııa arqyly qabyldady
ASTANA. QazAqparat - «Nur Otan» partııasynyń respýblıkalyq qoǵamdyq qabyldaýynda QR densaýlyq saqtaý jáne áleýmettik damý mınıstriniń birinshi orynbasary Salıdat Qaıyrbekova azamattardy qabyldady, dep habarlanǵan partııanyń resmı saıtynda.
Qabyldaý barysynda birinshi vıtse-mınıstrge turǵylyqty jeri boıynsha emhanaǵa esepke turý máselesi boıynsha Astana qalasynyń turǵyny Sáýle Qulybaeva ótinishpen keldi. «Kóshýimizge baılanysty bizdiń otbasymyzdy turatyn jerimizden qashyqta ornalasqan №7 qalalyq emhanaǵa tirkedi. Úsh balanyń anasy maǵan №10 emhanaǵa barý yńǵaılyraq», - dedi ol. Vıtse-mınıstr bul kez-kelgen áleýetti emdelýshiniń derbes quqy ekenin atap ótti. «Turǵylyqty jerińiz boıynsha emhanaǵa kóńilińiz tolmasa, bas dárigermen kelisimge qol qoıý arqyly óz otbasyńyzdy qalaǵan emhanańyzǵa esepke turǵyza alasyz. Biraq ol jaǵdaıda dárigerdiń úıde qaraý múmkindigi qarastyrylmaıdy, alaıda siz tańdaǵan mekemeńizge baryp, dárigerlerdiń keńesin ala alasyz», - dep atap ótti Salıdat Qaıyrbekova. Sonymen qatar beınekonferentsııa arqyly ótken qabyldaýda Salıdat Qaıyrbekovaǵa óńirlerdiń turǵyndary da ótinishterin aıtty. Atap aıtsaq, Qaraǵandy qalasyndaǵy oblystyq aýrýhanynyń gematologııa bólimi emdeýshileriniń atynan sóılegen Aısulý Mendeshova medıtsınalyq qyzmet sapasyn jaqsartýdy jáne bólimderdegi aýrýhanalyq kerýetterdi qysqartpaýdy ótindi. Osyǵan oraı Salıdat Qaıyrbekova bul máseleni sheshý úshin Qaraǵandy qalasyndaǵy oblystyq aýrýhananyń jetekshisi Marat Ábeýovpen habarlasty. Sondaı-aq onlaıyn-rejıminde Salıdat Qaıyrbekovaǵa Aqtóbe oblysynan Dáýlet Esengeldın habarlasyp, týǵanynan múgedek bolyp tabylatyn 2 jasar qyzyna shuǵyl dıagonstıka jasaýǵa yqpal etýge kómek kórsetýin surady. «Qyzym ortasha aýyrlyq dárejesindegi Vesta sındromymen syrqattanady. 2013 jyldyń sáýirinen beri tekserilý úshin qalalyq saýyqtyrý ortalyǵynda kezekte turmyz. Kezegimiz baıaý jyljyǵandyqtan, emdi bastaı almaı otyrmyz», - dep muńyn shaqty qyzdyń ákesi. Osyǵan oraı Salıdat Qaıyrbekova óńirlik densaýlyq saqtaý basqarmasy bóliminiń jetekshisimen habarlasyp, balanyń medıtsınalyq ortalyqta tekserilýi úderisin jedeldetýdi jáne qyzdyń densaýlyǵyn úzdiksiz baqylaýǵa alýǵa yqpal etýlerin surady.
