QR DMS: Qyzylshaǵa shaldyqqandardyń 65% – 5 jasqa deıingi balalar

Qyzylsha vırýsyn juqtyrǵandardyń 65% – 5 jasqa deıingi balalar. Bul týraly Densaýlyq saqtaý mınıstri Ajar Ǵınııat Úkimet otyrysynda málim etti, dep habarlaıdy Kazinform.

«Josparly ımmýndaýmen 600 myńnan astam bala qamtyldy. Bul 1 jas jáne 6 jastaǵy balalardyń 84% degen sóz jáne Dúnıejúzilik densaýlyq saqtaý uıymynyń usynymyna sáıkes keledi. Jyl sońyna deıin osy jas tobyndaǵy 100 myńnan astam bala vaktsınalaýǵa jatady.

Qyzylsha aýrýy bar oshaqtarda shuǵyl vaktsınatsııamen 15 myńnan astam adam qamtyldy. Buryn egilmegen 18 jasqa deıingi 63 myń adam sońǵy vaktsınalaýmen qamtyldy. Bul tıisti kontıngenttiń 50% ǵana. Áli 128 myń adamǵa ekpe salýymyz kerek», – dedi vedomstvo basshysy.

Mınıstrdiń sózinshe, qyzylshamen aýyrǵandardyń 65% – 5 jasqa deıingi balalar.

«Osyny eskere otyryp, qarasha aıynan bastap 1 jastan 5 jasqa deıingi balalardy qosymsha jappaı ımmýndaý bastaldy. Qazirgi tańda 94 myń bala qamtylyp otyr. Jalpy aǵymdaǵy jyly 770 myńnan astam bala egildi. Qyzylshaǵa qarsy vaktsınanyń qosymsha 1,5 mln dozasy satyp alyndy, onyń 500 myń dozasy kelip tústi, jeltoqsan aıynda 1 mln doza jetkiziledi dep kútilýde.

Qosymsha ımmýndaýdyń tıimdiligi 2005, 2015 jáne 2019 jyldarda qyzylshanyń órshýi kezinde dáleldendi.

Sondyqtan biz jeltoqsannyń ortasynda syrqattanýshylyqty azaıtýǵa múmkindik beretin qosymsha jappaı ımmýndaýmen joǵary qamtýǵa qol jetkizýimiz kerek», – dedi Ajar Ǵınııat.

Aıta keteıik, búgin Úkimet basshysy Álıhan Smaıylov qyzylshaǵa qarsy vaktsına alýdan basqa jol joq ekenin atap ótti.

Jeltoqsan aıynda Qazaqstanda 2-5 jastaǵy balalardy qyzylshaǵa qarsy egý bastalady.