QR Din isteri mınıstri: Radıkaldardyń sany azaıyp keledi
ASTANA. QazAqparat - QR Din isteri jáne azamattyq qoǵam mınıstri Nurlan Ermekbaev Sayasat.org saıtyna bergen suhbatynda qazirgi ýaqytta mınıstrlik teologtar tobyn jumyldyra otyryp, jat aǵymdardan saqtandyratyn ádistemeni daıarlap jatqanyn málim etti, dep habarlaıdy «QazAqparat» HAA tilshisi.
«Ashyǵyn aıtqanda, adamnyń dástúrli nemese jat dinı aǵymda júrgeninen buryn, onyń radıkaldaný dárejesi qaı satyda ekeni qoǵamnyń tynyshtyǵy úshin qaýiptirek. Olar dástúrli konfessııada bolǵanymen, radıkaldy pozıtsııada bolsa, qoǵamǵa qaýip týdyrýy múmkin. Biraq, radıkaldardyń sany azaıyp kele jatqanyn málimdegim keledi», - deıdi Nurlan Ermekbaev.
Mınıstrdiń aıtýynsha, radıkaldardyń sany osydan eki jyl burynǵy ýaqyttan góri azaıǵan. Sonymen qatar, ótken jyldyń aıaǵynan beri sırııalyq jáne ıraktyq aýmaqqa aýyp ketý jaǵdaıy tirkelmegen.
«Adamdarǵa oılaýǵa, belgili bir kózqarasta bolýǵa nemese ony ustanýǵa tyıym salmaımyz. Biraq, biz anyqtalǵan belgili bir ıdeologııany destrýktıvti dep aıta alamyz. Memlekette bul quqyq bar», - deıdi mınıstr.
Sonymen qatar, mınıstr deradıkaldandyrý úshin arnaıy ońaltý ortalyqtary jumys atqaryp jatqanyn, bul baǵytta 114 nómirine habarlasýǵa bolatynyn, el ishinde atalǵan jumysty túsindirýge baǵyttalǵan 300-ge jýyq aqparattyq-túsindirý toby baryn, túsindirý jumysyna kásibı teologtar, sarapshylar men ımamdar jumyldyrylyp jatqanyn atap ótti.
