QR Din isteri mınıstri Batys Qazaqstan oblysynyń jastarymen kezdesti
ASTANA. QazAqparat - QR Din isteri jáne azamattyq qoǵam mınıstri Nurlan Ermekbaev Batys Qazaqstan oblysyna jumys sapary barysynda «Bastaý» kovorkıng ortalyǵynyń jumysymen tanysyp, óńir jastarymen kezdesti, dep habarlaıdy vedomstvonyń baspasóz qyzmeti.
«Oralda oqýshylar men jastarǵa arnalǵan osyndaı záýlim saraıdyń bolǵandyǵy meni qatty qýantty. Munda jastarǵa arnalǵan ártúrli úıirmeler, shaǵyn ortalyqtar men kovorkıng ortalyǵy bar, sondaı-aq munda jastardyń shyǵarmashylyq turǵyda damýyna jáne qoǵam úshin paıdaly istermen aınalasýyna barlyq jaǵdaı jasalǵan. Ortalyq 3D-aqparattyq tehnologııalarymen, sonymen qatar zamanaýı kommýnıkatsııa quraldarymen jabdyqtalǵan. Bizdiń Mınıstrliktiń baǵytynyń biri - jastar saıasaty bolǵandyqtan, Batys Qazaqstan oblysynyń jastary «Týǵan jer», «Atameken», «Áleýmettik bastamalar kartasy» jobalary boıynsha belsendi jumys istep jatqanyna kózim jetti», - dedi Nurlan Ermekbaev.
Mınıstr Batys Qazaqstan oblysynyń jastarynyń qoǵam úshin belsendi bastamalardan qalys qalmaı, óte tuşymdy usynystarymen kózge túsip jatqandyǵyn atap ótti.
«Jastar tarapynan qoǵam úshin mańyzdy saýaldar kelip túsýde. Jalpy,qazirgi jastardyń boıynan ynta-jigerdiń, bolashaqqa degen nyq senimniń lebi seziledi. Osyndaı belsendi jastarǵa biz memleket tarapynan qoldaý kórsetýimiz kerek», - dedi mınıstr.
Oqýshylar men jastar saraıyna qarasty «Bastaý» kovorkıng-ortalyǵy bıylǵy jyldyń qazan aıynda ashylǵan bolatyn. Kovorkıng ortalyǵynyń jumysy «Rýhanı jańǵyrý» baǵdarlamasynyń sheńberinde jastardyń bastamalaryn damytý, olardyń qoǵam ómirine belsendi atsalysýyna baǵyttalǵan.
