QR Din isteri agenttiginiń tóraǵasy Qazaqstannyń Bas ravvıni men Astana qalasynyń jańa ravvınimen kezdesti
ASTANA. 31 tamyz. QazAqparat - QR Din isteri agenttiginiń tóraǵasy Qaırat Lama Sharıf Qazaqstandaǵy ıýdeılik dinniń jetekshisi - Bas ravvın Eshaıa Kogen men Astana qalasynyń jańa ravvıni Shmýel Karnaýhty qabyldady, dep habarlady onyń vedomstvosynyń baspasóz qyzmeti.
Kezdesý barysynda taraptar memlekettik-konfessııalyq qatynastardy odan ári damytý joldary týraly pikir almasty. Agenttiktiń tóraǵasy Izraıldiń Bas ashkenazı ravvıni Ion Metsgerdiń Álemdik jáne dástúrli dinder lıderleriniń úsh márte Astanada tabysty ótken sezderine belsene at salysqany úshin rızashylyǵyn bildire otyryp, suhbattasýlarmen 2012 jyldyń mamyr aıynda Astana qalasynda ótkizilýge josparlanǵan tórtinshi dinaralyq forýmdy uıymdastyrý máselelerin talqylady.
Iýdeılik din - evreı halqynyń dini ekeni jáne osy halyqtyń dúnıetanymy men turmys qalpyna aınalǵany belgili. «Iýdeı» sózi evreı halqynyń on eki urpaǵynan taraǵan ıAkovtyń uly Iegýda sózinen shyqqan. Iýdeılik dinniń negizinde etıkalyq, salttyq jáne turmystyq tártipteri ornatylǵan qatal monoteızm oryn alǵan.
Qazaqstan aýmaǵynda ıýdeılik dinniń taralýy XIX ǵasyrdyń sońy men XX ǵasyrdyń basynda patshalyq Reseıdiń Eýropalyq bóliginen qolónershi-evreılerdiń qonys aýdarýymen baılanysty bolǵan. Sondaı-aq qazaq jerine evreılerdiń jappaı kelýi ótken ǵasyrdyń 30-40-shy jyldary baıqalǵan. Sol kezde evreıler stalındik qýǵyn-súrginge ushyraǵandyqtan, amalsyz Qazaqstanǵa qonys aýdara bastaǵan.
Qazirgi ýaqytta Qazaqstanda ıýdeılik dindi nasıhattaıtyn 25 dinı birlestik tirkelgen. Sınagogalar Astanada, Almatyda, Aqtóbede, Petropavl men Pavlodarda jáne basqa da elimizdiń iri qalalarynda óz jumysyn atqarýda. Kópultty elimizde jyl saıyn ejelgi evreı halqynyń merekeleri keńinen toılanady, «Shalom» gazeti basyp shyǵarylady. Qazaqstan jerinde musylmandar, hrıstıandar men evreılerdiń uzaq jyldar boıy tatý-tátti ómir súrýi Elbasymyz N.Á.Nazarbaev negizin qalaǵan konfessııaaralyq kelisimniń oń úlgisi bolyp tabylady, dep atap ótti baspasóz qyzmeti.
