QR Din isteri agenttigi 579 dinı toptyń qyzmetin toqtatý baǵytynda jumystar atqarýda

Bul týraly búgin QR Úkimeti janyndaǵy Dinı birlestiktermen baılanystar jónindegi keńestiń otyrysynda atalǵan agenttiktiń tóraǵasy Qaırat Lama Sharıf aıtty.

«Agenttik óz quzireti aıasynda dinı qyzmet jáne dinı birlestiktermen ózara baılanys máseleleri boıynsha oblystardyń, respýblıkalyq mańyzdaǵy qalalar men Astananyń jergilikti atqarýshy organdarynyń qyzmetin úılestirýde. Jergilikti atqarý organdarymen ortaq kúsh jumyldyrý nátıjesinde zańǵa sáıkes zańdy tulǵa belgisi joq 579 sany az dinı toptardyń qyzmetin toqtatý boıynsha jumystar atqarylýda», - dedi agenttik basshysy.

Q.Lama Sharıftiń aıtýynsha, elimizdiń «Dinı qyzmet jáne dinı birlestikter týraly» zańy qabyldanǵanǵa deıin olar jergilikti atqarýshy organdarda tek eseptik tirkeýden ǵana ótetin. Olardyń basym bóligi Aqmola, Qaraǵandy, Soltústik Qazaqstan jáne Ońtústik Qazaqstan oblystarynda qyzmet jasaǵan.

 «Búgingi kúnde olardyń basym bóligi ákimdikterge óz qujattaryn ótkizip, qyzmetin toqtatty», - dedi ol.