QR Densaýlyq saqtaý mınıstrliginde birqatar kadrlyq ózgerister jasaldy
ASTANA. 3 maýsym. QazAqparat - Qazaqstan Respýblıkasynyń Densaýlyq saqtaý mınıstrliginde birqatar aýys-túıister jasaldy.
Bul týraly vedomstvonyń baspasóz qyzmetinen habarlady.
Qazaqstan Respýblıkasynyń Densaýlyq saqtaý mınıstrligi sybaılas jemqorlyq áreketterin aldyn alý maqsatynda Medıtsınalyq qyzmetterge aqý tóleý komıteti men Memlekettik sanıtarlyq-epıdemıologııalyq qadaǵalaý komıtetiniń óńirlerdegi organdarynda birqatar kadrlyq ózgerister jasady.
Máselen, Medıtsınalyq qyzmetterge aqý tóleý komıtetiniń Astana qalasy boıynsha Departamenti dırektorynyń orynbasary Medıtsınalyq qyzmetterge aqy tóleý komıtetiniń Tegin medıtsınalyq kómektiń kepildi kólemine saraptama jasaıtyn basqarma bastyǵy qyzmetine aýystyryldy.
Medıtsınalyq qyzmetterge aqý tóleý komıtetiniń Aqmola oblysy boıynsha Departament dırektory Astana qalasy boıynsha Departament dırektory qyzmetine aýystyryldy, al Aqmola oblysy boıynsha Departament dırektorynyń orynbasary Astana qalasy boıynsha Departament dırektorynyń orynbasary bolyp aýysty.
Al Memlekettik sanıtarlyq-epıdemıologııalyq qadaǵalaý komıtetiniń kóliktegi departamentiniń dırektory Aqmola oblysy boıynsha Memsanepıdqadaǵalaý departamentiniń dırektory etip taǵaıyndaldy.
Sondaı-aq Shyǵys Qazaqstan oblysynda Besqaraǵaı, Aıagóz, Kókpekti, Kúrshim, Zıaryn aýdandary men Kýrchatov qalasy boıynsha Memsanepıdqadaǵalaý basqarmalarynyń 6 bastyǵyna qatysty kadrlyq ózgerister jasaldy.
Aqtóbe oblysynyń Temir aýdany men Hromtaý qalasynyń memlekettik sanıtarlyq-epıdemıologııalyq qadaǵalaý organdarynyń basshylary da aýys-túıisten tys qalmady.
Densaýlyq saqtaý mınıstrliginen anyqtaǵandaı, kadrlardy aýystyrý jumystary aldaǵy ýaqytta sot-medıtsınalyq, sot-psıhıatrııalyq jáne sot-narkologııalyq saraptama júıelerinde júrgiziletin bolady.
«Uıymdastyrýshylyq jáne iskerlik qabiletterin eskere otyryp, negizgi pozıtsııalarǵa joǵary bilikti, saýatty, oıy ushqyr ári densaýlyq saqtaý salasynda tájirıbesi bar qyzmetkerler ornalastyrylatyn bolady. Erekshe nazar sondaı-aq kadrlar rezervin daıarlaýǵa bólinip otyr», - delingen taratylǵan habarlamada.
