QR Densaýlyq saqtaý mınıstrligi janyndaǵy Patsıentterdiń quqyqtaryn qorǵaý jónindegi qoǵamdyq keńestiń tóraıymy saılandy

ASTANA. 21 qańtar. QazAqparat - Búgin Densaýlyq saqtaý vıtse-mınıstri E.Baıjúnisovtyń tóraǵalyǵymen selektorlyq rejımde Qazaqstan Respýblıkasy Densaýlyq saqtaý mınıstrligi janyndaǵy Patsıentterdiń quqyqtaryn qorǵaý jónindegi qoǵamdyq keńestiń kezekti otyrysy ótkizildi.

Otyrysta atalmysh keńestiń jańa tóraıymy bolyp QR Parlament Májilisiniń depýtaty Nadejda Petýhova saılandy. Bul týraly QR Densaýlyq saqtaý mınıstrliginiń baspasóz qyzmeti habarlady.

Qoǵamdyq keńes otyrysyna Qazaqstan Respýblıkasy Parlamenti depýtattary, respýblıkalyq densaýlyq saqtaý uıymdarynyń, oblystardyń, Astana, Almaty qalalarynyń densaýlyq saqtaý basqarmalarynyń, úkimettik emes uıymdardyń ókilderi qatysty.

Densaýlyq saqtaý vıtse-mınıstri E.Baıjúnisov Keńes qurylǵannan beri densaýlyq saqtaý salasynyń ózekti máseleleri boıynsha úkimettik emes uıymdarmen jolǵa qoıylǵan belsendi árekettestikti atap ótip, nátıjeli ózara yntymaqtastyq 2013 jyly da jalǵasatyndyǵyna senim bildirdi.

Otyrys barysynda memlekettik áleýmettik tapsyrys sheńberinde 50-den astam úkimettik emes uıymdar qatysqan áleýmettik ıdeıalar konkýrsynyń jeńimpazdary jarııalandy. Densaýlyq saqtaý Ulttyq palatasynyń 2012 jylǵy qyzmetiniń qorytyndylary shyǵarylyp bıylǵy mindetteri belgilendi.

Aıta ketý kerek, Qazaqstan Respýblıkasy Densaýlyq saqtaý mınıstrligi memlekettik organdar arasynda alǵashqylardyń biri bolyp otandyq densaýlyq saqtaý salasyn damytý, medıtsınalyq kómektiń qoljetimdiligi men sapasyn arttyrý, halyqty dári-dármekpen qamtamasyz etý máseleri jóninde qoǵamdyq pikir ashyq túrde saralanatyn konsýltatıvtik organ - Patsıentterdiń quqyqtaryn qorǵaý jónindegi qoǵamdyq keńes qurdy.

Keńestiń ótken otyrystarynda organdar men tinderdi transplantatsııalaý, esirtkige táýeldi tulǵalarǵa opıoıdtyq orynbasýshy terapııany iske asyrý, QR onkologııalyq kómekti damytý, Densaýlyq saqtaý salasynyń kadrlyq resýrstaryn damytý tujyrymdamasy, temekige qarsy zańnamany saqtaý, densaýlyq saqtaý salasynda memlekettik-jekemenshik seriktestiktiń tájirıbesi týraly jáne taǵy basqa máseleler qaralǵanyn atap ótý kerek.

Otyrystyń qorytyndysynda Keńestiń jańa tóraıymy Nadejda Petýhova otandyq densaýlyq saqtaý salasynyń aldynda turǵan basty mindetterdi sheshýde barlyq múddeli taraptar birlese jumys atqarýy kerektigin atap ótti.