QR Densaýlyq saqtaý mınıstrligi qazaqstandyqtarǵa Qyrǵyzstan eline saparlamaýǵa keńes beredi

Bul týraly QR Densaýlyq saqtaý mınıstrliginiń baspasóz qyzmetinen habarlady.

Oba asa qaýipti indetke jatatynyn, aýa-tamshy arqyly, janasý joldarymen jáne jándikter shaqqan kezde juǵatynyn eskerip, Qazaqstan Densaýlyq saqtaý mınıstrligi qazaqstandyqtardan oba epıdemıologııalyq jaǵdaıy turaqtanǵanǵa deıin Qyrǵyzstanǵa saparlamaýdy ótinedi.

Qyrǵyzstan Densaýlyq saqtaý mınıstri Dınara Saǵynbaeva Qazaqstan Densaýlyq saqtaý mınıstri Qaıyrbekova Salıdatpen telefon arqyly sóıleskende resmı túrde bir adamnyń obanyń býbon formasynan qaza tapqanyn rastady.

Qyrǵyz áriptesteriniń ótinishi boıynsha, Qazaqstan Densaýlyq saqtaý mınıstrligi Qyrǵyzstanǵa mamandar brıgadasy men obany zertteýge arnalǵan dıagnostıkalyq dári-dármekter jiberdi.

Oǵan qosa, Qazaqstan Densaýlyq saqtaý mınıstrligi indet oshaǵynda epıdemııaǵa qarsy is-sharalardy ótkizý jóninde kómegin usyndy.

Eske sala keteıik, QR Densaýlyq saqtaý mınıstrligi Qyrǵyzstanmen shekaralas aýmaqtarda aldyn alý is-sharalaryn kúsheıtti.