QR Densaýlyq saqtaý mınıstrligi balalarǵa qaýipti oıynshyqtar tizimin jarııalady
Bas sanıtardyń aıtýynsha, ótken jylmen salystyrǵanda sapasyz oıynshyqtar sany 0,4%-ǵa ǵana azaıǵan.
Bıylǵy oıynshyqtardyń 35,6%-y tehnıkalyq reglament talaptaryna saı kelmeıdi, onyń ishinde 4,7% oqıǵa fızıka-hımııalyq jáne toksıkologııalyq kórsetkishter boıynsha, qalǵan 95,3%-y tańbalaý erejelerin buzǵan. Oıynshyqtardyń basym bóligi Qytaıda (65%), Reseıde, Belarýs pen Ózbekstanda, Qyrǵyzstan men Ýkraınada (23%) jasalǵan. Qalǵan 12%-ynda oıynshyqtyń qaıda jasalǵany jazylmaǵan.
«Qytaı ónerkásibinen shyqqan «Karapýz» kópfýnktsııaly qýyrshaǵy men «LAVA» oıynshyǵy, Reseıdiń «AELITA» plastmassa óńdeý zaýyty shyǵarǵan «Vesennıaıa progýlka» jınaǵy, «Ogonek» zaýyty shyǵarǵan «Lıagýshka s lıagýshatamı» plastmassa oıynshyǵy men Belarýs Respýblıkasynan jetkiziletin «Tsıferka» oıynshyǵyn satyp alýǵa keńes bermeımiz. Olardyń quramynda ruqsat etilgen kólemnen tys formaldegıd, fenol jáne stırol kontsentratsııalary bar qaýipti toksıkologııalyq kórsetkishter anyqtaldy», - dedi Jandarbek Bekshın Ortalyq kommýnıkatsııalar qyzmetinde ótken baspasóz máslıhatynda.
Jandarbek Bekshınniń aıtýynsha, sapasyz oıynshyqtardyń naryqqa shyǵýyna birden bir sebebi - usaq saýdagerderdiń oıynshyqtardy esh baqylaýsyz qol júgimen ákelýi. Sondaı-aq, ol qaýipti oıynshyqtardy ákeletin negizgi jetkizýshiniń - Qostanaıdaǵy «Soıýz-ıgrýshka» JShS ekenin málimdedi.
7 uıymǵa qatysty sotqa aryz túsirilgen jáne sot sheshimimen 2,5 mln teńgeden astam aıyppul salynǵan, 5 uıymnyń qyzmeti ýaqytsha toqtatylǵan. Sondaı-aq, 1,5 tonnadan astam balalar oıynshyǵy aınalymnan shyǵarylǵan.
Sonymen birge, mınıstrlik ókili quqyq buzǵan uıymdardy atap kórsetti. Olar - shyǵysqazaqstandyq ıA.A. Kýrbatov jáne E.E. Hasenov jeke kásipkerlikteri, almatylyq «Advatos» JShS-y, «Sılk Veı Ekspress» JShS-y jáne «Interneshnl Kompanı» JShS-lary.
Jandarbek Bekshın balalar oıynshyǵyn satýshylardyń kóterme jetkizýshilerden sáıkestik sertıfıkatyn talap etýi qajettigin atap ótti jáne sertıfıkattalmaǵan ónimniń shekaradan ótkizilmeıtinin habarlady.
«Satýshylar men jetkizýshiler úshin balalardyń densaýlyǵy sońǵy orynda bolyp otyr. Sol sebepti, memlekettik baqylaý júıesin jetildirýimiz qajet. Osyǵan baılanysty Qoǵamdyq densaýlyq saqtaý komıteti balalar oıynshyǵyn shartty shyǵarylym rejimimen kirgizýge tyıym salý bastamasyn kóterdi jáne zańdyq negizdeme qabyldady. Endi keden beketterindegi oıynshyqtar aldyn ala sertıfıkattaýdan keıin ǵana ótkiziletin bolady», - dep túıindedi J.Bekshın.
Eske sala ketsek, 12 jeltoqsan kúni QR Premer-Mınıstri Baqytjan Saǵyntaev Úkimet otyrysynda tártip buzatyn kásipkerler men olardyń taýarlary týraly aqparatty ashyq jarııalaýdy usynǵan edi.