QR Densaýlyq saqtaý mınıstri J. Dosqalıev UOS-nyń ardagerlerin Jeńistiń 65 jyldyq mereıtoıymen quttyqtady
Búgin Densaýlyq saqtaý mınıstri óziniń vedomstvosynda Jeńis kúnine oraı Astanada ótetin merekelik sharalarǵa qatysý úshin Jambyl oblysynan kelgen ardagerlerdiń bir tobymen kezdesti. Olar barsha qazaqstandyqtardyń atynan júrek jardy tilekterin bildirdi.
«Búgin biz Uly Jeńistiń 65 jyldyq mereıtoıy qarsańynda kezdesip otyrmyz. Soǵys bastalǵanda «bul kúnniń atar tańy bar ma, joq pa?», dep muńaıa oılanǵandar da bolǵan shyǵar. Biraq sizderdiń qaıtpas qaısarlyqtaryńyz ben qajymas rýhtaryńyzdyń arqasynda ol kúnge qol jetkizildi. Sizderdiń bul Jeńisterińiz úshin, búgingi bizdiń baqytty ómirimiz úshin, búgingi urpaq qana emes, aldaǵy talaı urpaq ıilip alǵystaryn aıtýlary tıis», - dedi J.Dosqalıev ardagerlerge qaratyp aıtqan sózinde.
Óz kezeginde ardagerler qaýymynyń atynan Jambyl oblystyq Ardagerler keńesiniń tóraǵasy Tleýǵabyl Tórebekov sóz alyp, ózderine kórsetilip jatqan jan-jaqty iltıpatqa alǵysyn jetkizdi.
Qarııalardyń barlyǵyna gúl shoqtary men baǵaly syılyqtar tartý etildi.
