QR Densaýlyq saqtaý mınıstri Salıdat Qaıyrbekova Almatydaǵy birqatar medıtsınalyq mekemelerdi aralady
ALMATY. 2 naýryz. QazAqparat - Búgin Almatyda Qazaqstan Respýblıkasynyń Densaýlyq saqtaý mınıstri Salıdat Qaıyrbekova Almaty qalasynyń Densaýlyq saqtaý basqarmasynyń keńeıtilgen alqa keńesiniń otyrysynan soń ońtústik Astananyń birqatar medıtsınalyq mekemelerin aralap, kórip shyqty.
Atap aıtqanda, Densaýlyq mınıstri aldymen Balalar hospısinde, odan keıin Perınatologııa jáne balalar kardıohırýrgııasy ortalyǵynda boldy. Onda mınıstr mekemelerdiń tynys-tirshiligimen tanysyp, nysandardyń barlyq bólimshelerin aralap, ortalyqtyń qyzmetkerlerimen jáne ondaǵy emdelýshilermen áńgimelesti.
Esterińizge sala keteıik, onkologııalyq aýrýlarmen aýyratyn balalarǵa arnalǵan alǵashqy balalar hospısi Almatyda ótken jyly mamyr aıynda qaterli aýrýǵa (isikke) shaldyqqan balalardyń hálin sál de bolsa jaqsartý, balaǵa jáne olardyń ata-anasyna medıtsınalyq, psıhologııalyq kómek berý maqsatynda ashylǵan bolatyn. Munda balalar tegin emdeledi.
Atalmysh hospıstiń ashylýyna muryndyq bolǵan "Salamatty Azııa" qoǵamdyq qorynyń prezıdenti Naǵıma Plohıh vedomstva basshysymen kezdesý barysynda memleket tarapynan bólinetin qarjynyń azdyǵyn aıtty. Óz kezeginde Densaýlyq saqtaý mınıstri Salıdat Qaıyrbekova bul máseleniń sheshiletindigin jetkizdi.
Naǵıma Plohıh aıtýynsha, jylyna elimizde 500-ge jýyq bala qaterli isik aýrýlaryna shaldyǵady eken. "Búgingi tańda 7000-daı bala osyndaı aýrýlarmen esepte tur. Almaty qalasynyń ózinde 30-ǵa jýyq bala tirkelgen. Qaterli isikpen aýyrǵan balalardyń 60-70 paıyzy aýrýdyń úshinshi-tórtinshi ósý satysynda anyqtalady, bul ýaqyt isiktiń denege jaıylyp, tarap, onymen kúresýge medıtsınanyń kúshi kelmeıtin kez. Mundaı naýqastarǵa qaraý ata-anaǵa túsetin úlken aýyrtpalyq ekeni aıtpasa da túsinikti. Bizdiń mekeme balalar men olardyń ata-analaryna mundaı qıyn-qystaý kezeńde kómek berý maqsatynda arnaıy ashylǵan",-deıdi ol.
Al, ekinshi nysan - Almaty Perınatologııa jáne balalar kardıohırýrgııasy ortalyǵy osydan úsh aı buryn, 2011 jyly qarasha aıynda «100 mektep, 100 aýrýhana» memlekettik baǵdarlamasy aıasynda ashylǵan bolatyn. Az ýaqat ishinde munda týa bitti júrek aqaýy bar 60-tan asa nárestege ota jasalynǵan jáne operatsııalardyń barlyǵy sátti ótken. Ortalyq 150 orynǵa arnalǵan, zaman talabyna saı, eń ozyq tehnologııalarmen jabdyqtalǵan. Ol júrekterinde aqaýy bar bolashaq analarǵa arnalǵan eń alǵashqy perzenthana bolyp tabylady. Ortalyqqa Almaty qalasy men elimizdiń barlyq óńirlerinen atalmysh dıagnoz qoıylǵan júkti áıelder jatqyzylady. Bala týylǵannan keıin dál osy jerde onyń júregine "hırýrgııalyq túzeý" jasalady. Ortalyqtyń ereksheligi de osynda - týa bitken júrek aqaýy bar nárestelerge der kezinde em kórsetiledi.
