QR Densaýlyq saqtaý mınıstri dárigerlerdiń áleýmettik jelidegi shaǵymyna jaýap berdi
«Meniń qurmetti áriptesterim, qymbatty Janar Muhamedjanova, Tamara Ámirbekova, Tatıana Borısovna, Gúlnara Haırına jáne Aıman Oralbaeva. Sizderdiń málimdemelerińizdi júregim aýyryp otyryp oqydym jáne sizderdiń narazylyqtaryńyzdy túsinemin. Sizder júrgen COVID-19 juqtyrǵandarǵa arnalǵan statsıonardaǵy jaǵdaı sizderde ǵana emes, mende de úlken suraq týyndatatynyn moıyndaýǵa májbúrmin.
Ortalyq statsıonar birneshe ret ınfektsııadan ótti, tekserildi jáne osy ınfektsııany emdeý úshin barlyq zamanaýı talaptarǵa sáıkes oqshaýlaǵysh dep anyqtaldy.
Qazir osy fakti boıynsha komıssııa quryp jatyrmyn jáne taıaý ýaqytta bul oqıǵany sheshýge ýáde etemin. Dál sizderdiń aldyńǵy sapta júrip, naýqastardy ómirin arashalap jatqandaryńyzdy jaqsy túsinemin!
Týystaryńyzdy, jaqyndaryńyz ben balalaryńyzdy tastap, búkil ýaqytyńyzdy jumys ornynda ótkizip jatqandaryńyzdy da bilemin. Memlekettik komıssııanyń jaqyn aradaǵy otyrysynda aýrýmen kúresip jatqan dárigerlerge barlyq jaǵdaı jasaý máselesin kóterip, taǵy bir nazar aýdartamyn.
Gúlnara, Siz: «Memleket pen kásipkerler qaıyrymdylyqqa bólgen aqshalar qaıda ketti?» dep suraq qoıdyńyz.
Olar túrli maqsatqa: jeke qorǵaný quraldaryn, dári-dármek quraldaryn, medıtsınalyq quraldardy, koronavırýsty dıagnostıkalaýǵa arnalǵan testilerdi satyp alýǵa, bizdiń azamattardy «qaýipti» elderden evakýatsııalaýǵa, medıtsına qyzmetkerleri men eldiń ekonomıkasyn osy qıyn kezeńde qoldaýǵa jumsalyp jatyr. Dárigerlerge kórsetiletin kómek týraly aıtar bolsaq, myna dúnıeni naqty aıta alamyn – el Prezıdentiniń tapsyrmasy boıynsha taıaý kúnderi epıdemııalyq sharalarǵa qarsy tartylǵan medıtsına qyzmetkerlerine aı saıyn ústeme aqy belgilenedi. Barlyǵyńyz juqtyrý qaýpi joǵary adamdar tobyna jatasyzdar, bul árıne, el basshylyǵyn alańdatyp otyr, sizderdi qorǵaý úshin barlyq sharalar jasalýda», - dep jazdy mınıstr.
Densaýlyq saqtaý mınıstri syılyqaqy berý úshin qaýpi boıynsha 3 top belgilengenin atap ótti.
«Qaýiptiligi asa joǵary top úshin 850 myń teńge kóleminde ústemeaqy belgilendi – buǵan reanımatsııa bólimshelerin qosa alǵanda, ınfektsııalyq statsıonarlardyń dárigerleri, orta jáne kishi medıtsına qyzmetkerleri jatady. Ekinshi toptaǵy medqyzmetkerlerdiń jalaqysyna 425 myń teńge qosylady. Úshinshi orta top úshin 212,5 myń teńge ústeme aqy belgilengen», - delingen habarlamada.
Eljan Birtanov atalǵan sanatqa jatpaıtyn dárigerlerden kóptegen ótinish túsip jatqanyn aıtty.
«Qazirgi ýaqytta Densaýlyq saqtaý mınıstrligi Memleket basshysynyń dárigerlerdiń eńbegin yntalandyrý jónindegi tapsyrmalaryn iske asyrý boıynsha jumys istep jatyr. Atap aıtqanda, biz tizim jasaý tetigi jáne medıtsına qyzmetkerlerine qosymsha aqy qalaı tólenetini egjeı-tegjeıli qarastyrylǵan qosymsha buıryq ázirlep jatyrmyz. Eń aldymen juqpaly aýrýlar aýrýhanalarynda jumys isteıtinderdi, jansaqtaý bóliminde ómir úshin kúresip jatqandardy, sondaı-aq jańa koronavırýs ınfektsııasyna qarsy kúreske tartylǵan barlyq medqyzmetkerler tizimge enedi.
Barlyq sheshim ashyq túrde, komıssııa aldynda qabyldanady. Óńirlerde komıssııa quramynda qoǵam jáne kásipodaq uıymdary, «Nur Otan» partııasy, jergilikti atqarýshy organdar – densaýlyq saqtaý basqarmasy men áleýmettik qorǵaý basqarmasynyń ókilderi kiredi», - dep jazdy mınıstr.
Ol aqpan aıynda Áleýmettik medııtsnalyq saqtandyrý qory esebinen Nur-Sultan jáne Almaty qalalarynda jumyldyrylǵan dárigerlerge eki ese jalaqy tólengenin eske saldy.
«Prezıdent tapsyrmasy boıynsha, jumyldyrylǵan medqyzmetkerlerge ústemeaqy tóleý maqsatynda respýblıkalyq bıýdjetten qosymsha qarajat bólindi. Sáıkes buıryq shyqqannan keıin 5 sáýirge qaraı naýryz aıy úshin tólemder tólenedi», - dedi Eljan Birtanov.
Sondaı-aq, densaýlyq saqtaý mınıstri barlyq medqyzmetkerlerdi qalaýy boıynsha koronavırýsqa qarsy kúresýge shaqyrdy.
«Búginde búkil álem syn-qaterge tap boldy. Biraq, biz birge alǵa qaraı jyljyp kelemiz, turǵyndardy aýrý juqtyrýdan qorǵaý úshin barlyq sharalardy jalǵastyryp jatyrmyz. Bul barlyǵymyz birlesip ótetin synaq. Bizge kómekteskisi keletin áripstesterimizdi komandamyzǵa qosylýǵa shaqyramyn! Ol úshin sizder oblystaǵy nemese qaladaǵy densaýlyq saqtaý basqarmasynyń kadr bólimine habarlasýlaryńyz kerek.
Qurmetti áriptester! Bizge qazir búkil el qarap otyr, qoldaý kórsetip, senim bildirip jatqanyn umytpaýymyz kerek!», - dep jazdy mınıstr.