QR Densaýlyq saqtaý mınıstrligi Irkýtsk oblysyndaǵy jaǵdaıdy baqylaýda ustap otyr
ASTANA. KAZINFORM – QR Densaýlyq saqtaý mınıstrligi Reseı Federatsııasynyń Irkýtsk oblysynda asa qaýipti ınfektsııaǵa kúdik keltirilgen jaǵdaı týraly habarlamaǵa baılanysty ondaǵy epıdemıologııalyq ahýaldy baqylaýda ustap otyrǵanyn habarlady.
– Qazaqstanda jaǵdaı turaqty baqylaýda, aldyn alý sıpatyndaǵy qajetti sharalar qabyldandy. Memlekettik shekara arqyly ótkizý pýnktterinde sanıtarııalyq-karantındik baqylaý júrgizilip jatyr. Kóliktiń barlyq túrinde dene qyzýy joǵarylaǵan, aýrý belgileri nemese asa qaýipti ınfektsııaǵa kúdigi bar adamdar anyqtalǵan joq. Aldyn ala baǵalaý boıynsha, ınfektsııanyń Qazaqstanǵa ákeliný qaýpi tómen deńgeıde qalyp otyr. Jaǵdaıǵa baǵa berý jáne qabyldanyp jatqan sharalar resmı aqparattyń túsýine qaraı naqtylanatyn bolady. Sapardan keıin aýrý belgileri paıda bolǵan jaǵdaıda medıtsınalyq kómekke ýaqtyly júginip, dárigerge bolǵan jerińiz ben sapar kúnderi týraly habarlaý qajet, - delingen habarlamada.
Densaýlyq saqtaý mınıstrligi azamattarǵa resmı aqparat kózderine ǵana senýge keńes berehdi. Qolda bar málimetterge sáıkes, qazirgi ýaqytta reseılik mamandar epıdemıologııalyq tergep-tekserý júrgizip jatyr. Qorytyndy dıagnoz ázirge resmı túrde rastalǵan joq, yqtımal juqtyrý kózi men mán-jaılary anyqtalyp jatyr.
Medıtsınalyq baqylaýda 197 baılanysta bolǵan adam bar. Qolda bar málimetter boıynsha, olardan aýrý belgileri anyqtalǵan joq, zerthanalyq zertteý nátıjeleri teris.
Shelehov aýdandyq aýrýhanasynda qajetti epıdemııaǵa qarsy is-sharalar júrgizilip jatyr. Jeksenbi, 4 qazanda Rospotrebnadzordyń baspasóz qyzmeti Irkýtsk oblysynda, Irkýtsk qalasynda jáne Shelehovta sanıtarııalyq-epıdemıologııalyq jaǵdaı turaqty ekenin jáne oba aýrýynyń jaǵdaılary anyqtalmaǵanyn habarlady.
Irkýtsk oblysynda 28 jastaǵy áıeldiń qaıtys bolý sebebi etıologııasy anyqtalmaǵan pnevmonııa retinde sıpattalyp otyr.
Aıta keteıik, Qazaqstanda jyl basynan beri 7,4 myńnan astam ishek ınfektsııasy tirkeldi.
