QR-da jel kúsheıip, boran soǵady, joldarda kóktaıǵaq paıda bolady - 24 qarashaǵa arnalǵan aýa raıy boljamy
ASTANA. 23 qarasha. QazAqparat - QR-nyń basym bóliginde atmosferalyq aǵymdardyń ótýine baılanysty 24 qarashada turaqsyz aýa raıy saqtalady, keıbir jerlerde burqasyn bolyp, jel kúsheıedi, joldarda kóktaıǵaq paıda bolady.
Qazaqstannyń batys jáne ońtústik bólikteri ǵana antıtsıklon yqpalynda bolady, munda jaýyn-shashynsyz aýa raıy kútilýde, dep habarlaıdy TJM-niń baspasóz qyzmeti Qazgıdrometke silteme jasaı otyryp.
Aqmola, Soltústik Qazaqstan oblystarynyń birqatar aımaqtarynda kóktaıǵaq bolyp, 15-20 m/s deıin jyldamdyqpen jel soǵýy, burqasyn bolýy yqtımal.
Qostanaı, Qaraǵandy, Pavlodar, Shyǵys Qazaqstan oblystarynyń keı jerlerinde burqasyn bolyp, 15-20 m/s jyldamdyqpen jel soǵýy, Qostanaı, Qaraǵandy oblystarynyń jekelegen aýdandarynda túnde tuman túsýi múmkin.
Jambyl, Ońtústik Qazaqstan oblystarynda, túnde Almaty, Atyraý oblystarynyń birqatar aımaqtarynda tuman túsedi, Jambyl oblysynda túnde keı jerlerde jeldiń jyldamdyǵy 15-20 m/s deıin jetedi.
Aldaǵy úsh táýlikte Qazaqstannyń soltústik, soltústik-shyǵys, ortalyq, shyǵys bólikterinde jáne ońtústik-shyǵysynyń jekelegen ózenderinde muz qatý jalǵasady, osyǵan baılanysty respýblıkanyń ońtústik-shyǵys jáne shyǵysyndaǵy jekelegen ózenderde sý deńgeıi kóterilýi múmkin.
Shardara sý qoımasynan tolqyndardyń taralýy esebinen Syrdarııa ózeniniń Ońtústik Qazaqstan jáne Qyzylorda oblystaryndaǵy aýmaǵynda sý deńgeıiniń kóterilýi yqtımal.
Esterińizge sala keteıik, buǵan deıin Astana jáne Aqmola oblysynda boranǵa baılanysty eskertý jarııalanǵan bolatyn, 23-25 qarasha kúnderi burqasyn, jeldiń 15-20 m/s jyldamdyqpen soǵýy yqtımal.
