QR-da orta bilikti tehnıkalyq mamandarǵa suranys artty - D.Arǵyndyqov
«Respýblıkada orta bilikti tehnıka mamandaryna degen suranys joǵary bolatyny anyqtaldy. Onyń mólsheri 57,1 myń adamdy nemese elimizdegi jalpy kadr suranysynyń 43%-yn qurap otyr. Sonymen birge, jumys berýshilerdiń biliktiligi tómen nemese biliktiligi joq mamandarǵa degen suranysy joǵary. Ol 33% bolyp otyr. Bilim berý men densaýlyq saqtaý salasyndaǵy mamandarǵa degen suranys ta joǵary - 15%. Injenerlik-tehnıkalyq kadrlarǵa degen suranys qajettiligi boıynsha sońǵy orynnan bir saty joǵary tur - respýblıka boıynsha nebári 6,2 myń adam (jumys berýshiler suranysynyń 4,6%-y) ǵana kerek. Keńse jumyskerleri, ákimshilik personal men ózge de qyzmetkerlerge degen suranys óte tómen - 4%», - dedi D.Arǵyndyqov.
Ol ótken jyly «Atameken» Ulttyq kásipkerler palatasymen birlese otyryp 3700 jumys berýshiler arasynda mamandyqtar men kásipterine qaraı kadrlar suranysyn anyqtaý maqsatynda saýalnama ótkizilgenin eske saldy.
«Bıylǵy jyly qatysýshylardyń sany áldeqaıda ulǵaıtyldy. Bul saýalnama nátıjesiniń senimdiligi men onyń aıasyn keńeıtýge múmkindik berdi. 2016 jyly jalpy qyzmetkerler sany 880 myńnan astam adamdy quraıtyn barlyǵy 7 myńnan asa jumys berýshi saýalnamadan ótti», - dedi D.Arǵandyqov.
Saýalnama nátıjesi boıynsha 2016 jyly jumyskerlerge degen suranys 134 myń adamdy qurady.
Aqparattyq-taldaý ortalyǵy basshysynyń málimetinshe, negizgi suranys saýda, qarjylyq jáne saqtandyrý qyzmetteri, jyljymaıtyn múlik syndy qyzmet kórsetý salalaryna tıesili. Ekonomıkanyń naqty sektorynda jalpy kadr qajettiligi 49 myń adamǵa baǵalanyp otyr, sonymen birge, onyń jartysyna jýyǵy aýylsharýashylyq sektoryna qajet ekeni belgili boldy. Ónerkásip salasynda kadrlarǵa suranystyń negizgi bóligi óńdeý ónerkásibine tıesili, onyń basym kópshiligi kıim, aıaq kıim, sondaı-aq, aǵashtan jasalatyn zattar óndirisinde qajet bolyp otyr. Jalpy alǵanda, atalǵan sala ónerkásipteri óz qyzmetkerler shtatyn 10%-dan astam kórsetkishke ulǵaıtýǵa múmkindikteri bar.
JP ATO prezıdenti memlekettik baǵdarlamalardy, onyń ishinde «Jumyspen qamtý 2020 jol kartasy» jáne «Bıznestiń jol kartasy - 2020» baǵdarlamalaryn júzege asyrý sharalary jeke menshik sektordyń damýyna septigin tıgizip kele jatqanyn atap aıtty.
«Eger sońǵy jyldary eńbek resýrstaryna suranys memlekettik sektor tarapynan bolsa, bıylǵy jyly suranystyń 80%-y jeke sektordyń úlesinde», - dedi ol.
Aımaqtar arasynda kadrlar suranysynyń basym kópshiligi Almaty, Ońtústik Qazaqstan, Shyǵys Qazaqstan oblystarynda, sonymen birge, Astana, Almaty (jalpy suranystyń 60%-y) baıqalady.
Sonymen, atalǵan oblystardaǵy jalpy suranys 60,8 myń qyzmetkerdi qurasa, Astana men Almaty qalalarynda - 20,9 myń adam bolyp otyr.
Brıfıngte aıtylǵandaı, salalardaǵy negizgi suranys 5 salaǵa tıesili: suranystyń úshten bir bóligine jýyǵy (42 myń adam) saýda, qarjy, jyljymaıtyn múlikpen aınalysatyn óndiristerden; suranystyń 17% (23 myń adam) aýylsharýashylyq kásiporyndarynan;suranystyń 12%-y (16,3 myń adam) bilim berý salasy uıymdarynan; 10% - y (13,6 myń adam) - qurylys kompanııalarynan kelse, óndiristik kásiporyndarǵa 12,2 myń qyzmetkerler qajet, bul suranystyń 9%-yn qurap otyr.
