QR-da balalar quqyǵyn qorǵaý boıynsha 14 joba júzege asyp jatyr - Nurlan Ermekbaev
ASTANA. QazAqparat - Balalar ombýdsmeniniń bastamasymen Qazaqstandaǵy balalar quqyǵyn qorǵaý boıynsha quny 163 mln teńgelik 14 granttyq joba júzege asyp jatyr. Bul týraly QR Din isteri jáne azamattyq qoǵam mınıstri Búkilálemdik balalar kúnine oraı uıymdastyrylǵan halyqaralyq konferentsııa barysynda málim etti, dep habarlaıdy «QazAqparat» HAA tilshisi.
«Bıyldan bastap Qazaqstan Respýblıkasyndaǵy bala quqyqtary jónindegi ýákili Zaǵıpa Balıevanyń bastamasymen bizdiń mınıstrlik balalardyń quqyǵy men múddesin qorǵaýǵa baǵyttalǵan quny 163 mln teńgelik 14 jobany iske asyra bastady. Bul aýqymdy jumystyń basy ǵana. Eger elimizdegi 13 myń Úkimettik emes uıymnyń joq degende 10 paıyzy balalardyń quqyǵy men múddesin qorǵaý baǵytynda jumys júrgizse, bizdiń balalar men jasóspirimder tolyǵymen qajetti qamqorlyqta bolar edi», - deıdi Nurlan Ermekbaev.
Onyń aıtýynsha, atalǵan granttyq jobalardyń taqyryby birinshi halyqaralyq «Balalarǵa meıirimdi Qazaqstan» konferentsııasynyń qorytyndysy boıynsha belgilengen. Ol jobalardyń taqyrybyn ombýdsmen, Balalardyń quqyǵy boıynsha BUU komıteti maquldaǵan. Osy jobalar aıasynda zertteý jumystary júrgizilip, bilim jáne keńes berý ortalyqtary, 7 ÚEU bazasynda áleýmettik qyzmettiń shaǵyn jelileri paıda bolǵan. Jalpy, jobalar boıynsha 65 myń bala men jasóspirim qamtylǵan.
Aıta ketsek, «Balalarǵa meıirimdi Qazaqstan» taqyrybyndaǵy 2-shi halyqaralyq konferentsııa úkimettik emes sektor men halyqaralyq uıymdardyń ókilderimen birge balalar quqyǵy jónindegi ombýdsmenmen seriktese jumys júrgizý aıasynda ótkizilip otyr. Konferentsııanyń jumysyn júrgizý 20-21 qarashaǵa kózdelgen. Oǵan memlekettik organdardyń ókilderi, Parlament depýtattary, ÚEM músheleri, halyqaralyq sarapshylar, halyqaralyq uıymdardyń ókilderi men túrli uıymdardyń músheleri qatysýda.
