QR-da áýe kompanııalarynyń halyqaralyq tasymal jasaǵandaǵy jaýapkershiligin qataıtýda
ASTANA. 23 qańtar. QazAqparat - Jolaýshylardyń múddelerin qorǵaý maqsatynda qazirgi tańda Kólik jáne kommýnıkatsııa mınıstrligimen halyqaralyq áýe tasymalynyń jeke erejelerin bir qalypqa keltiretin Monrealdik konventsııany QR-da bekitý jóninde jumys atqarylýda. Ol áýe tasymaldarynyń eskirgen normalaryn almastyryp, tasymaldaýshylardyń jolaýshylar aldyndaǵy jaýapkershiligin arttyrady.
Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.
Monrealdik konventsııany bekitý batys áýe tasymaldaýshylarynyń qyzmetterin paıdalanatyn qazaqstandyq jolaýshylarǵa ózderiniń múddelerin turatyn meken-jaı boıynsha qorǵaýǵa múmkindik beredi - mysaly, sapar bolmaı qalǵan kezde ne sapar kidirisi týyndap, bagajdyń joǵalýy nemese búlinýi jaǵdaılarynda. Qazirgi kezde shetel kompanııasyna sot arqyly aıyp taǵý sol áýe kompanııanyń tirkelgen orny boıynsha ǵana múmkin.
«Birinshiden, jolaýshylar sapaly qyzmetterdi alý úshin barynsha jaǵdaı jasap, áýe kompanııanyń áreketimen baılanysty qaýip-qaterlerge olardy táýelsiz etý qajet. Eger másele týyndap jatsa jolaýshylarda óz múddelerin qorǵaý múmkindigi bolý qajet», - dep habarlady QR KKM Azamatyq avıatsııa komıtetiniń tóraǵasy Beken Seıdahmetov.
Sonymen birge ol Konventsııanyń qabyldanýy tasymaldaýshylardyń jaýapkershiligin arttyrýǵa jaǵdaı jasaıtynyn jáne qazaqstandyq zańnamany batys elderiniń zańnamalarymen úılestiretinin belgiledi.
Qazirgi kezde Monrealdik konventsııanyń músheleriniń qatarynda jalpy alǵanda 97 memleket, olardyń ishinde AQSh, Saýd Arabııasy, EO elderi jáne t.b. bar ekenin belgilegen jón.
