QR-da aýa raıynyń turaqsyzdyǵy saqtalady, keı jerlerde naızaǵaı jarqyldap, jańbyr jaýady - 30 shildege arnalǵan aýa raıy boljamy
ASTANA. 29 shilde. QazAqparat - Qazaqstannyń basym bóliginde kún raıy ashyq bolady dep kútilýde, tek eldiń batys, soltústik-batys jáne shyǵys bóliginde aýa raıynyń turaqsyzdyǵy saqtalady, keı jerlerde naızaǵaı jarqyldap, jańbyr jaýady, uıytqyǵan jel soǵady, shań kóterilip, daýyl turady, jekelegen aýdandarda tuman túsedi.
Bul týraly Qazgıdrometke silteme jasap, QR TJM baspasóz qyzmetinen habarlaıdy.
Aqmola, Soltústik Qazaqstan, Qostanaı oblystarynda túnde jáne tańerteń keı jerlerde tuman túsedi dep kútilýde.
Shyǵys Qazaqstan, Batys Qazaqstan, Aqtóbe, Atyraý oblystarynda, túnde - Mańǵystaý oblysynda keı jerlerde jeldiń 15-20 m/s-qa deıin kúsheıýi kútilýde, Batys Qazaqstan oblysynda shań kóterilip, daýyl turady.
Almaty, Jambyl, Ońtústik Qazaqstan oblystarynda, Qyzylorda, Qaraǵandy oblystarynda kúndiz qatty ystyq saqtalady.
Batysta, ońtústikte, ortalyqta, ońtústik-shyǵysta keı jerlerde tótenshe joǵary órt qaýpi saqtalady.
Jaqyn táýlikterde Almaty oblysynyń jekelegen taýly ózenderinde sý shyǵyny ulǵaıady dep kútilýde. Respýblıkanyń ońtústigi, shyǵysynyń ózenderinde sý deńgeıiniń turaqsyzdyǵy baıqalady. Qazaqstannyń jazyq aýmaǵynyń ózenderinde gıdrologııalyq tártipte aıtarlyqtaı ózgerister kútilmeıdi.
