QR chempıonatynda jeńiske jetken «Shahter» komandasy 15 mln. teńgelik sertıfıkatqa ıe boldy
QARAǴANDY. 8 qarasha. QazAqparat - Qaraǵandyda Kenshiler mádenıet saraıynda QR chempıonatynda qatarynan ekinshi márte altyn júldeni jeńip alǵan «Shahter» komandasynyń fýtbolshylary marapattaldy.
Saltanatty rásimge Qaraǵandy oblysynyń ákimi Ábilǵazy Qusaıynov, Qazaqstan fýtbol federatsııasynyń vıtse-prezıdenti Seıilda Baıshaqov, sport qoǵamdastyǵynyń ókilderi, jas sportshylar, eńbek ardagerleri, komandanyń jankúıerleri qatysty.
Aımaq basshysy «Shahter» respýblıka chempıonatynda qatarynan eki ret jeńiske jete alǵan besinshi qazaqstandyq komanda bolǵanyn atap ótti. «Shahter» komandasyna deıin mundaı tabysqa semeılik «Elimaı», pavlodarlyq «Ertis», astanalyq «Jeńis» jáne «Aqtóbe» qol jetkizgen edi», - dep atap ótti ol.
Oblys ákimi jáne QFF-nyń vıtse-prezıdenti chempıondarǵa altyn júlde tabys etti. Aımaq basshysy komandaǵa sondaı-aq 15 mln. teńgelik sertıfıkat tabystady.
Budan basqa, aımaq sportyna qosqan úlesi úshin «Shahterdiń» sporttyq dırektory Ulyqbek Asanbaev, bas jattyqtyrýshysy Vıktor Kýmykov, jattyqtyrýshylar - Evgenıı Sveshnıkov pen Roman Ýzdenov, fýtbol klýbynyń atqarýshy dırektory Erden Halılın oblys ákiminiń Qurmet gramotalaryn aldy.
Saltanat barysynda QR Premer-Mınıstri Serik Ahmetov pen QR Parlament Májilisiniń tóraǵasy Nurlan Nyǵmatýlınniń quttyqtaýlary oqyldy.
