QR burynǵy Densaýlyq saqtaý mınıstrine qatysty isti tergeý aıaqtaldy

Bul týraly QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı habarlady.

«Ústimizdegi jyldyń 18 aqpanynda QR Densaýlyq saqtaý mınıstrliginiń burynǵy basshysy Jaqsylyq Dosqalıevke qatysty qozǵalǵan qylmystyq istiń tergelýi aıaqtaldy. Oǵan mansabyn asyrǵan, para alǵan, qyzmettik laýazymyn asyra paıdalaný arqyly memleketke 673 mıllıon teńge shyǵyn keltirip, 2,4 mıllıard teńgeniń bıýdjettik qarjysyn talan-tarajǵa saldy degen aıyp taǵyldy», - dedi M.Jumanbaı QazAqparat tilshisine bergen suhbatynda.

Búgin aıyptalýshy men onyń qorǵaýshylaryna qylmystyq istiń materıaldyrymen tanystyrý protsedýrasy júrgizilgenin atap ótti.

Eske sala ketsek, J.Dosqalıevke qatysty qylmystyq is 2010 jyldyń qyrkúıeginde qozǵaldy. Oǵan qyzmettik laýazymyn asyra paıdalandy, asa iri kólemde para aldy, laýazymdyq ókilettiligin asyra paıdalaný arqyly bıýdjettik qarjyny jymqyrdy degen aıyptar taǵyldy. Mınıstr qylmystyq jaýapkershilikten jaltarý úshin jalǵan ınsýlt jasady degen de kúdik taǵyldy.