QR Boks federatsııasy kýbogynyń jeńimpazy 25 mln teńge utyp aldy
ShYMKENT. QazAqparat - Almaty qalasynda Qazaqstan boks federatsııasynyń kýbogy úshin VIII maýsymdyq jarystardyń jeńimpazdary anyqtaldy. Aqtyq básekege joldama alǵan Ońtústik Qazaqstan men Mańǵystaý oblysynyń sportshylary ózara myqtyny anyqtady, dep habarlaıdy QazAqparat tilshisi.
Aıta keteıik, Mańǵystaýlyq boksshylary 2012 jáne 2016 jyly kýbokty jeńip alsa, OQO komandasy 2015 jyly jeńimpaz atanǵan bolatyn. Aqtyq saıysta 52 keli salmaqta mańǵystaýlyq boksshy jaraqatyna baılanysty oıynnan shyǵyp, OQO komandasyna bir upaı jazyldy. Sóıtip boksshy Shalqar Aıqynbaı jeńimpaz bolyp tanyldy. Tartysty ótken básekede mańǵystaýlyq boksshy, álem chempıonatynyń júldegeri, Azııa chempıony, olımpıadaǵa qatysýshy Berik Ábdirahmanov pen Sultan Zaýyrbektiń oıyny boldy. Eki sportshy da sharshańqyrap qalǵandaryna qaramastan qaıtpaı judyryqtasty.
Alaıda qarsylasynan 10 jas úlken mańǵystaýlyq boksshynyń óz ózine degen senimdiligi jeńiske jetkizdi. Mańǵystaýlyq komandaǵa upaıdy sonymen qatar Nulbol Qaljanov pen osy jyly ótken Azııa chempıonatynyń kúmis júldegeri Erik Áljanovtar da qosyp úlgerdi. Degenmen bul jolǵy jeńis ońtústiktiń sportshylaryna buıyrdy. Shalqar Aıqynbaıden keıin rıngke Azııa oıyndarynyń júldegeri Baǵdáýlet Ibragımov pen Bekzod Halmetov, Bek Nurmaǵambet, Erkin Muhametjan shyqty. Erkin Muhamedjan oblysqa altynshy upaı alyp berse, Nurjan Bekzatov ta qarsylasynan basym tústi. Qorytyndy esep 7:3 bolyp, ońtústiktiń bylǵary qolǵap sheberleri jeńiske jetti. 
Osylaısha Ońtústik Qazaqstan oblysynyń boksshylary ekinshi ret Qazaqstan kýbogynyń jeńimpazy atanyp, 25 mln teńge utyp aldy.
«Biz komanda sapynda negizinen jas boksshylardy alyp keldik. Olar jas ta bolsa tájirıbeli sportshylar sanalady. Beseýi halyqaralyq dárejedegi sport sheberleri bolsa, ózgeleri sport sheberleri. Al utyp alǵan 25 mln teńgeni óńirde boksty damytý maqsatynda jumsamaqpyz. Atap aıtqanda komandanyń jattyǵýyna kerek-jaraqtyń bárin satyp almaqpyz», - dedi OQO komandasynyń bas bapkeri Nurlan Aıtýarov.
