QR bilim jáne ǵylym vıtse-mınıstri Saıat Shaıahmetov qyzmetinen bosatyldy
ASTANA. 20 mamyr. QazAqparat - Bilim vedomstvosynyń baspasóz qyzmeti habarlaǵandaı, úıqamaqta otyrǵan QR bilim jáne ǵylym vıtse-mınıstri Saıat Shaıahmetov bul qyzmetinen Úkimet qaýlysymen aǵymdaǵy jyldyń 8 mamyrda bosatylǵan.
Úkimettiń 2013 jylǵy 8 mamyrdaǵy qaýlysymen QR bilim jáne ǵylym vıtse-mınıstri S.B.Shaıahmetov basqa jumysqa aýysýyna baılanysty atqaratyn qyzmetinen bosatyldy. Mınıstrliktegi jumysy oń sıpattalyp otyr. Kez kelgen adamnyń kináli nemese kinásiz ekendigin sot organdary sheshedi, osy negizde ǵana tıisti qorytyndylar shyǵaryp, túsindirme berýge bolady», - delingen QR BǴM baspasóz qyzmetiniń habarlamasynda.
Eske sala keteıik, 2013 jylǵy 29 sáýirde QR Ekonomıkalyq qylmysqa jáne sybaılas jemqorlyqqa qarsy kúres agenttigi (qarjy polıtsııasy) Óskemen qalasyndaǵy 700 oqýshyǵa arnalǵan bilim mekemesiniń qurylysy kezinde 1,5 mlrd. teńgege jýyq somadaǵy bıýdjet qarajatyn ıemdený jáne talan-tarajǵa salý faktisi boıynsha qylmystyq is qozǵady.
Osy jylǵy 14 mamyrda atalǵan qylmysty jasaýǵa kúdikti QR bilim jáne ǵylym vıtse-mınıstri S.Shaıahmetov pen «QR salynyp jatqan bilim jáne ǵylym nysandary dırektsııasy» JShS bas dırektory A.Pak ustaldy. 17 mamyrda sot sanktsııasymen Shaıahmetov úıqamaqqa alyndy, Pak - tutqyndaldy.
Budan buryn osy qylmysqa qatystylyǵyna aıyptalyp, «ZAK Servıs» JShS burynǵy bas dırektory R.Kıreev tutqyndalǵan bolatyn.
Qylmystyq is tergelýde, basqa aqparat tergeý múddesine oraı jarııalanbaıdy.
