QR Bilim jáne ǵylym mınıstrliginde lıtsenzııasy toqtatylǵan kezeńde JOO-lardyń qalaı jumys jasaıtynyn túsindirdi
ASTANA. QazAqparat - Qazirgi ýaqytta elimizdegi 22 joǵary oqý ornynyń lıtsenzııasynyń áreketi 1 aıdan 6 aıǵa deıin toqtatyldy, dep habarlaıdy QR Bilim jáne ǵylym mınıstrliginiń baspasóz qyzmetinen.
«2014 jyldyń sońynda Bas prokýratýra men Bilim jáne ǵylym salasyndaǵy baqylaý komıteti birlesip respýblıkanyń 32 jekemenshik JOO-na tekseris júrgizgen. Birlesken tekseris nátıjesinde ákimshilik is boıynsha Qazaq ınjenerlik, qarjy-bank akademııasy (Almaty q.), Qazaq ınjenerlik-tehnıkalyq akademııasy (Astana q.), «Kókshe» akademııasy (Kókshetaý q.) lıtsenzııasy qaıtarylý úshin sotqa jiberildi, 22 JOO-da 1 aıdan 6 aıǵa deıin lıtsenzııa áreketi toqtatyldy», delingen habarlamada.
Sondaı-aq mınıstrliktiń Bilim jáne ǵylym salasyndaǵy baqylaý komıteti óz betinshe 2014 jyly 31 JOO-na josparlyq tekseris júrgizgen jáne 18 JOO-nyna memlekettik kýálandyrý jasaǵan. Qazirgi kezde 9 JOO-da lıtsenzııa áreketi 6 aıǵa deıin toqtatylǵan. Lıtsenzııa toqtatylǵan kezeńde bilim berý barysy jalǵasady. Bul ýaqyt ishinde JOO-na anyqtalǵan zań buzýshylyqtardy joıý qajet, óz qyzmetterin bilim týraly zańnyń qaǵıdasyna jáne ruqsat berý men eskertý týraly zańǵa sáıkestendirý kerek. Lıtsenzııa áreketi toqtatylǵan merzim ótken kezde, aldynda anyqtalǵan eskertýlerdiń túzetilgenin naqtylaý boıynsha qaıta tekseris júrgiziledi. Eger qaıta tekseris barysynda eskertýler túzetilmese, Bilim jáne ǵylym salasyndaǵy baqylaý komıteti bilim berý qyzmetiniń lıtsenzııasyn qaıtaryp alý úshin zańnamaǵa sáıkes sotqa ákimshilik is jiberedi. JOO-nyń bilim berý qyzmeti tek sottyń sheshimi boıynsha toqtatylady. Memlekettik baqylaý sharalary birinshi kezekte bilim berý uıymdarynyń bilim berý qyzmetin lıtsenzııalaý boıynsha biliktiligin talap etýge, bilim zańy boıynsha jáne bilimniń memlekettik jalpy bilim berý úlgisin oryndaýdy talap etýge baǵyttalǵan. Osylaısha, memlekettik baqylaý tek ońtaılandyrýdan góri, JOO-ny kóbirek yntalandyrýǵa, ózderiniń materıaldyq jáne zııatkerlik resýrstaryn jaqsartýǵa jáne eń bastysy, bilim berý qyzmetiniń sapasyn kóterýge baǵyttalǵan.
Esterińizge sala keteıik, 1991 jyly elimizde 55 JOO jumys istedi. Qazaqstan Táýelsizdiginiń birinshi onjyldyǵynda jekemenshik sektorlar belsendi damydy jáne 2001 jylǵa deıin JOO sany eń kóp sanǵa - 182-ge jetti. Sonymen qatar básekeles orta quryldy, al ótpeli ekonomıkalyq jaǵdaıda jastardy jappaı JOO-larda oqytý, olardy jumyspen qamtamasyz etý máselesiniń ótkirligin tómendetti. Alaıda JOO-lar sanynyń ósýi daıyndalyp jatqan mamandardyń sanyna da, sapasyna da eleýli sáıkessizdik alyp keldi. Osyǵan baılanysty, Qazaqstan Respýblıkasynyń Bilim jáne ǵylym mınıstrligi 2012 jyldan bastap JOO-lar jelisin ońtaılandyrý boıynsha sapasyz bilim berý qyzmetin kórsetetinderge júıelik jumys júrgizedi. Osy ýaqyt ishinde JOO-lar sany 148-den 126-ǵa deıin qysqartyldy. Tek qana 2014 jyldyń ózinde 5 JOO-nyń «Ekonomıka jáne basqarý akademııasy - Evrazııalyq naryq ınstıtýty» (Almaty q.), Jambyl gýmanıtarlyq-tehnıkalyq ýnıversıteti (Taraz q.), Qazaqstan-Reseı ýnıversıteti (Astana q.), Taraz tehnıkalyq ýnıversıteti (Taraz q.), Qazaq-qytaı akademııasy (Qyzylorda q.), bilim berý qyzmetin júrgizý lıtsenzııalary qaıtarylyp alyndy. JOO ońtaılandyrý barysy 3 qurylymmen : qosý, akademııa, ınstıtýt, kolledj deńgeıine túsirý, JOO lıtsenzııasyn qaıtaryp alý jolymen júzege asyrylady.
2014 jyldyń maýsym aıynda QR Premer-Mınıstriniń tóraǵalyǵymen joǵarǵy oqý oryndaryn jańǵyrtý boıynsha respýblıkalyq komıssııa quryldy. Komıssııa quramyna Parlament depýtattary, quqyq qorǵaý organdarynyń, Bas prokýratýrasynyń, úkimettik emes uıymdardyń, JOO-lardyń ókilderi kirdi. 2014 jyly komıssııanyń 8 otyrysy ótkizildi, 42 jeke menshik JOO-nyń qyzmeti qarastyryldy jáne Qazaqstan Respýblıkasynyń Bas prokýratýrasyna atalmysh mınıstrlikpen birlesip jeke JOO-larǵa tekseris júrgizý tapsyryldy.
