QR Bilim jáne ǵylym mınıstri úzdik dep tanylǵan 200 JOO oqytýshysyna memlekettik granttar tabystady
ASTANA. QazAqparat - QR Bilim jáne ǵylym mınıstri Aslan Sárinjipov Astanadaǵy «Shabyt» shyǵarmashylyq saraıynda «JOO-nyń 2014 jylǵy eń úzdik oqytýshysy» dep tanylǵan 42 ýnıversıtettiń 200 oqytýshysyna memlekettik granttardy tabys etti.
Dástúrli saıysqa ótken jyly respýblıkanyń 90 joǵary oqý ornynan 545 úmitker qatysqan bolatyn. Bilim mınıstri atap ótkendeı, «Joǵary oqý ornynyń úzdik oqytýshysy» memlekettik grantyn ıelengenderdiń basym denin ǵylymı ataǵy bar oqytýshylar quraıdy. Atap aıtqanda, 70 paıyzǵa jýyǵy professorlar men ǵylym doktorlary, qalǵandary - dotsentter, ǵylym kandıdattary jáne PhD doktorlary.
Olardyń arasynda astanalyq oqytýshylar da bar. Solardyń on tórti Elbasy Nursultan Nazarbaev negizin qalaǵan L.N.Gýmılev atyndaǵy Eýrazııa ulttyq ýnıversıtetinde bilim beredi. Olardyń toǵyzy - ǵylym doktory, beseýi - ǵylym kandıdattary. Mamandyqtary da ár saladan: fızıka-tehnıkalyq, jaratylystaný ǵylymdary, áleýmettik ǵylymdar, ekonomıka, mehanıka-matematıka fakýlteti. Atap aıtqanda, G.Aıqynbaeva, R.Bersimbaı, J.Ermekova, E.Jýravleva, S.Qojaeva, D.Madııarova, R.Oınarov, R.Orazbaeva, K.Sádýaqasova, T.Samuratova, S.Sahıev, M.Serik, S.Tájibaeva, A.Tóleǵulov QR BǴM-nyń grantyn ıelenip, ǵylymı jańalyqtaryn ómirge engizýge múmkindik aldy, dep habarlaıdy atalmysh JOO baspasóz qyzmetinen.
Memlekettik grant otandyq oqytýshylarǵa Ulybrıtanııa, Germanııa, Frantsııa, Italııa, Ispanııa, Belgııa, Polsha, Avstrııa, Bolgarııa, Lıtva, Latvııa, Reseı jáne taǵy basqa memleketterdiń jetekshi joǵary oqý oryndarynda synaqtan ótýge múmkindik beredi. Sonymen qatar grant ıegerleri bir jyl boıy halyqaralyq ǵylymı konferentsııalarǵa, sımpozıýmdarǵa, kongressterge, ǵylymı-zertteý taqyryptaryna arnalǵan semınarlarǵa qatysa alady.
