QR Bilim jáne ǵylym mınıstri Nashaqorlyqqa qarsy kúshterdiń ІІ halyqaralyq semınar-forýmyna qatysýshylarmen kezdesti

Eske sala keteıik, Nashaqorlyqqa qarsy kúshterdiń ІІ halyqaralyq semınar-forýmy QR BǴM-nyń qoldaýymen jáne «Salaýatty Qazaqstan» qoǵamdyq birlestiginiń uıymdastyrýymen ústimizdegi tamyz aıynyń 16-sy kúni, Aqmola oblysyndaǵy Býrabaı kýrorttyq aımaǵynda bastaldy. Oǵan Qazaqstanmen qatar, Reseı, Belarýs, Kıpr jáne Lıtva memleketteriniń pedagogtary, arnaıy jáne mektep psıhologtary, áleýmettik qyzmetkerler, kámeletke tolmaǵandar isteri jónindegi komıssııalar men ınspektsııalardyń ókilderi, Joǵarǵy sot pen salaýatty ómir ortalyqtarynyń esirtkimen kúres jónindegi qyzmetkerleri, qoǵamdyq birlestikterdiń basshylary, jastar uıymdarynyń kóshbasshylary qatysýda. Shara tamyzdyń 20-syna deıin jalǵasady.

Kezdesý barysynda mınıstr, jas urpaqtyń densaýlyǵyna nazar aýdarý jáne jastar ortasynda nashaqorlyqqa qarsy kúres júrgizý Qazaqstan úshin ǵana emes, sondaı-aq TMD elderi úshin de óte mańyzdy ekendigin atap ótti.

«Qazaqstan Respýblıkasy Eýrazııalyq keńistiktiń basym bóligin alyp jatyr. Biz de sońǵy 10 jylda atalmysh problemamen betpe-bet keldik. Aýǵanstannan keletin esirtkiler Qazaqstan aýmaǵy arqyly tasymaldana bastady. Aýǵandyq arzan apıyn men geroın bizdiń zańsyz naryqta áli de ústemdik etýde», - dedi J.Túımebaev.

J.Túımebaevtyń aıtýynsha, Qazaqstan aýmaǵy arqyly aýyr esirtki zattarynyń tasymaldanýy saldarynan el ishinde esirtkige táýeldilerdiń de sany artyp otyr. Degenmen, keshendi is-sharalardyń nátıjesinde zańsyz esirtki bıznesin aýyzdyqtaý kórsetkishteri jyldan jylǵa artyp keledi. Máselen, aǵymdaǵy jyly respýblıka boıynsha tárkilengen geroınnyń kólemi ótken jylmen salystyrǵanda 86 paıyzǵa artty.

Aıta keteıik, búginde QR Parlamenti esirtkini baqylaý boıynsha BUU-nyń barlyq negizgi konventsııalaryn ratıfıkatsııalady. Esirtkiniń zańsyz aınalymyn retteıtin jáne esirtkige táýeldi tulǵalardy medıtsınalyq-áleýmettik ońaltý zańdary qabyldandy. Sonymen birge, qoldanystaǵy zańnamalarǵa kontrabanda men esirtki saýdasymen aınalysqandarǵa jaýapkershilikti kúsheıtý boıynsha zańǵa tıisti ózgertýler engizildi.