QR Bilim jáne ǵylym mınıstri Memleket tarıhy ınstıýtynyń ǵalymdarymen kezdesti
ASTANA. 4 qarasha. QazAqparat - Búgin Qazaqstan Respýblıkasy Bilim jáne ǵylym mınıstri Baqytjan Jumaǵulov Memleket tarıhy ınstıtýtynda boldy. Mınıstr qyzmetkerlerdiń jumys jaǵdaıymen, ǵylymı jumysynyń josparymen tanysty, dep habarlady QR Bilim jáne ǵylym mınıstrliginiń baspasóz qyzmeti.
B.Jumaǵulov ınstıtýttyń májilis zalynda ǵalymdarmen keńes ótkizdi. Jınalys barysynda mınıstr ınstıtýttyń ár bólim basshylaryna suraq qoıyp, olardyń atqaryp jatqan jumystarymen tanysyp, tolyǵyraq aqparat aldy.
Kezdesý barysynda Instıtýt dırektory professor B. Aıaǵan irgeli zertteýler aıasynda júzege asyrylǵan jobalar týraly aıtyp berdi.
Ǵalymdar aldynda mınıstr óz sózinde, ınstıtýtta ǵalymdardyń tolyqqandy jumys isteýi úshin jaqsy jaǵdaılar jasalǵan dedi. Instıtýttyń materıaldyq-tehnıkalyq bazasy sońǵy úlgidegi kompıýter tehnıkasymen, keń de jaryq kabınettermen jabdyqtalǵan. Memleket tarıhy ınstıtýty Qazaqstan Respýblıkasynyń Prezıdenti N. Nazarbaevtyń bastamasymen ashylǵanyn atap ótti.
Odan ári ınstıtýttyń ǵylymı jumys isteý baǵytyn taldaı kele, mınıstr óz oıymen bólisti.
- Instıtýt Qazaqstandy álemge pash etetin shyǵarmalar óndirip, sonymen qatar álem memleketteriniń Qazaqstanǵa degen kózqarastary men jasaǵan saraptamalaryn tereń zertteı bilýi kerek.
QR BǴM Ǵylym komıtetiniń «Memleket tarıhy ınstıtýty» memlekettik mekemesi Qazaqstan Respýblıkasy Úkimetiniń 2008 jylǵy 5 mamyrdaǵy № 416 qaýlysymen quryldy. Instıtýt dırektory qyzmetine tarıh ǵylymdarynyń doktory, professor B. Aıaǵan taǵaıyndaldy.
Qazirgi ýaqytta ınstıtýtta 45 qyzmetker eńbek etedi. Sonyń ishinde 37 ǵylymı qyzmetkerler, 7 ǵylym doktory, 7 ǵylym kandıdaty bar.
Instıtýt qurylǵan kezden bastap ǵalymdardyń ǵylymı jáne qoǵamdyq-saıası taqyryptarǵa arnalǵan 26 kólemdi eńbekteri daıyndalyp, 2009 jyly ─ 15, ústimizdegi jyly─ 11 kitap jaryqqa shyqty.
Instıtýt qyzmetiniń basymdy baǵyttarynyń biri halyqaralyq yntymaqtastyqty ornatý jáne nyǵaıtý bolyp tabylady. Atap aıtqanda, ınstıtýt M.V. Lomonosov atyndaǵy MMÝ tarıh fakýltetimen, Bashqurtstan Ǵylym akademııasymen jáne alys-jaqyn shetelderdiń ǵylymı ortalyqtarymen kelisim-shart jasasty. Instıtýt ǵalymdarynyń maqalalary «Istorıcheskıı arhıv», «Voprosy ıstorıı», «Rodına» jáne t.b. sheteldik ǵylymı basylymdarda jarııalanyp turady.
2009 jyly ınstıtýt ujymy AQSh, Reseı, Túrkııa, Frantsııa ǵalymdarymen, onyń ishinde Kolýmbııa ýnıversıtetiniń janyndaǵy Garrıman ınstıtýtynyń professory R. Abazovpen, RǴA Sibir bólimshesiniń arheologııa jáne etnografııa ınstıtýtynyń etnografııa bóliminiń meńgerýshisi, tarıh ǵylymdarynyń doktory, I.V. Oktıabrskaıamen jáne Magnıtogor memlekettik ýnıversıteti arheologııa jáne etnografııa zerthanasy jetekshisi, tarıh ǵylymdarynyń kandıdaty, dotsenti I.R. Atnagýlovpen, Ystambuldaǵy Mımar Sınan ýnıversıtetiniń professory, tarıh ǵylymdarynyń doktory (Túrkııa) Ábdýlaqap Qaramen, frantsýz tarıhshysy, tarıh ǵylymynyń doktory Per Le Vellerommen kezdesý ótkizdi.
2010 jyldyń mamyr aıynda ınstıtýt ǵalymdary Halyqaralyq eýrazııalyq kongress pen TMD elderiniń tarıhshylar forýmyn uıymdastyrǵa belsendilikpen qatysty.
Instıtýt janynan 07.00.02-Otan tarıhy (Qazaqstan Respýblıkasynyń tarıhy), 07.00.09-Tarıhnama, derektaný jáne tarıhı zertteý ádisteri mamandyqtary boıynsha doktorlyq ǵylymı dárejesin qorǵatatyn Birikken dıssertatsııalyq keńes ashyldy.
Qazirgi Qazaqstan tarıhynyń ózekti máseleleri ǵalymdardyń eńbekterinde, respýblıkalyq jýrnaldar men gazet betterinde kórinis tabýda. Sondaı-aq, ınstıtýtta atqarylyp jatqan osyndaı jaqsy isterdiń barlyǵyn qoǵammen tanystyrý maqsatynda, radıo men telearnalarmen de jaqsy qarym-qatynas ornatylǵan
Instıtýttyń shaǵyn baspahanasynda «Tarıh jáne saıasat» atty qazaq, orys tilderindegi aı saıynǵy gazet, «Memleket tarıhy» atty ǵylymı jýrnal shyǵarylyp jáne ınternettegi www. memti. kz saıtynda ınstıtýttyń jańalyqtary týraly molynan habarlar berilip turady.
Kezdesý sońynda Instıtýt dırektory Búrkitbaı Ǵylmanuly ǵalymdardyń eńbekterin syı retinde mınıstrge tabys etti. Mınıstr óz rızashylyǵyn bildirip, ınstıtýt ujymyna shyǵarmashylyq tabys tiledi.
