QR Bilim jáne ǵylym mınıstri mektep oqýshylaryn Bilim kúnimen quttyqtady
ASTANA. QazAqparat - Elordada №70 mektep-lıtseıdiń alǵashqy qońyraýyna QR Bilim jáne ǵylym mınıstri Erlan Saǵadıev qatysyp, oqýshylardy jańa oqý jylymen quttyqtady.
«Jańa oqý jylynyń bastalǵanymen shyn júrekten quttyqtaımyn. Ár ata-ananyń arman-maqsaty - óz balalarynyń durystap oqyp, bilimdi bolyp, bilim men ǵylymnyń arqasynda eldiń eleýli azamattary bolyp, esimderi elge tanylǵany. Memleketimiz, Elbasy barlyq jaǵdaı jasap jatyr. Ár ata-ananyń osy armany oryndalsyn! Sát sapar tileımin!» - dedi mınıstr oqýshylar men ata-analarǵa tilegen aqjoltaı tileginde.
Aıta keteıik, elimizde bıyl 1 qyrkúıek kúni 2,8 mln oqýshy mektepke barady. Olardyń 370 myńy - alǵash ret mektep tabaldyryǵyn attaǵaly otyrǵan búldirshinder.
Qazaqstannyń barlyq orta bilim berý mekemelerinde Bilim kúni QR Táýelsizdiginiń 25 jyldyǵyna jáne Konstıtýtsııa kúnine oraı saltanatty túrde alǵashqy qońyraý uıymdastyrylady, sondaı-aq biryńǵaı «Men - óz elimniń patrıotymyn» taqyrybynda sabaq ótedi.
Jergilikti atqarý organdarynyń málimetine súıensek, jańa oqý jyly qarsańynda esigin ashqaly otyrǵan mektepter sany - 7126. Jańa oqý jylyna deıin 60 jańa mektep paıdalanýǵa berilý josparlanǵan, al 2016 jyldyń sońyna deıin 32 jańa mektep berilmek. 
