QR Bilim jáne ǵylym mınıstri Qazaq ulttyq agroýnıversıtetiniń 80 jyldyq mereıtoıy sharalaryna qatysty
LMATY. Qazannyń 21-i. QazAqparat - Búgin Qazaqstan Respýblıkasy Bilim jáne ǵylym mınıstri Baqytjan Jumaǵulov jáne Almaty qalasynyń ákimi Ahmetjan Esimov óziniń 80-jyldyq mereıtoıyn atap ótip jatqan Qazaq ulttyq agrarlyq ýnıversıtetinde boldy, dep habarlady QR Bilim jáne ǵylym mınıstrliginiń baspasóz qyzmeti.
Olar mereıtoı baǵdarlamasy sheńberinde Qazaqstan-Japon ınnovatsııalyq ortalyǵynyń qyzmetimen tanysyp, tamaq jáne ekologııalyq qaýipsizdik zerthanasynda, sondaı-aq «elektrondyq mıkroskopııa» ınjenerlik zerthanasynda boldy. Ortalyq qyzmetkerleri zerthana jabdyqtarynyń múmkindikterin kórsetip, sondaı-aq bıotehnologııa men nanotehnologııanyń basym baǵyttary boıynsha júzege asyrylatyn baǵdarlamalar men jobalar týraly aıtyp berdi.
Sodan keıin Japonııanyń, Gollandııanyń, Germanııanyń, Polshanyń jáne Qazaqstannyń 10 oblysynyń ǵylymı ortalyqtarynyń jetekshi mamandary qatysqan on-laın jelisindegi konferentsııa ótkizildi.
Qonaqtar elimizdiń agrarlyq sektoryndaǵy ǵylymı jetistikteriniń nátıjelerin baıandaıtyn ınnovatsııalyq kórmeni aralap kórdi, ol ázirlemelerdi daıyndaýǵa QUAÝ-dyń ǵalymdary belsene qatysqan.
Bas korpýstyń aldyndaǵy alańda qonaqtar ýnıversıtet stýdentterimen kezdesti.
Elimizdiń bilim vedomstvosynyń basshysy alys jáne jaqyn shetelderdegi joǵary oqý oryndarynyń rektorlarymen birge Qazaq Ulttyq agrarlyq ýnıversıteti Ǵylymı keńesiniń merekelik májilisine qatysty. Ol Respýblıka Prezıdenti N.A.Nazarbaevtyń quttyqtaý hatyn oqyp berip, elimizdiń tarıhy baı joǵary oqý ornyna tabys, stýdent-jastarǵa tereń bilim, týǵan jerge degen súıispenshilik tiledi.
