QR Bilim jáne ǵylym mınıstri qala men aýyl arasyndaǵy bilim berý sapasynyń alshaqtyǵyna alańdaýly
ASTANA. 3 qazan. QazAqparat - QR Bilim jáne ǵylym mınıstrliginiń jańa basshysy Aslan Sárinjipov qala men aýyl arasyndaǵy bilim berý sapasynyń alshaqtyǵyna alańdaýly.
Búgin Astanada «Úzdik ustaz» respýblıkalyq baıqaýynyń jeńimpazdaryn marapattaý rásiminde vedomstvo basshysy bilim salasyndaǵy keıbir kórsetkishterge toqtaldy. Máselen, búginde 7 402 jalpy bilim berý mektepteri jumys isteýde. Onyń 78 paıyzy (5 776) aýyldyq jáne 21 paıyzy (1 626) qalalyq mektepter. Jalpy bilim beretin oqý oryndarynda 2,5 mln. bala bilim alýda, sonyń 51 paıyzy (1,3 mln.) aýyldyq jerlerdiń úlesinde.
«Búginde bizdi qala men aýyl arasyndaǵy bilim sapasy boıynsha bastalǵan alshaqtyq alańdatady. Memlekettiń mindeti - áleýmettik mártebege nemese turǵylyqty jerine qaramastan sapaly orta bilimge teń qoljetimdilikti qamtamasyz etý. Aýyldyq balalardyń qalalyq qatarlastarynan talanttylyǵy esh kem emes. Alaıda, olarǵa mektepte tıisti bilim berilmese, biz osy oqýshylardyń aldyndaǵy esikterdi japqanmen teń bolady», - dedi mınıstr.
Osy oraıda A. Sárinjipov sapaly bilimge degen teńdeı qoljetimdilik pen múmkindikter naqty bolýy kerektigin qadap aıtty.
Sóz sońynda mınıstr aýyldyq ustazǵa joǵary jaǵdaı men qoǵamda laıyqty syı-qurmetti qamtamasyz etý úshin barlyǵyn jasaýǵa ýáde etti.
