QR Bilim jáne ǵylym mınıstri ál-Farabı atyndaǵy QazUÝ ujymyna jańa rektordy tanystyrdy
ALMATY. Qazannyń 8-i. QazAqparat /Názıra Eleýhan/- Búgin QR Bilim jáne ǵylym mınıstri Baqytjan Jumaǵulov ál-Farabı atyndaǵy QazUÝ ujymyna, jaqynda Memleket basshysynyń Ókimimen jańa rektor bolyp taǵaıyndalǵan Ǵalymqaıyr Mutanovty tanystyrdy.
"Elimizdegi eń iri ýnıversıtetti basqarý - ol eń aldymen Elbasynyń úlken senimi jáne Memleket basshysynyń elimizdiń bilim júıesi aldynda qoıǵan mindetterdi jaýapkershilikpen atqarý", - dedi B. Jumaǵulov.
Mınıstr jıynǵa qatysqandardy Ǵalymqaıyr Mutanovtyń eńbek jolymen tanystyrdy. Ol - tehnıka ǵylymdarynyń doktory, professor, Halyqaralyq ınjenerlik akademııasynyń, Halyqaralyq joǵary mektep akademııasynyń, Eýrazııa Halyqaralyq ekonomıkalyq akademııasynyń, Halyqaralyq shyǵarmashylyq akademııasynyń, Halyqaralyq kadrlar akademııasynyń múshesi. Qazaqstan Respýblıkasynyń ǵylym jáne tehnıka salasyna eńbek sińirgen qaıratkeri. Ǵalymqaıyr Mutanov buǵan deıin Petropavl qalasyndaǵy Joǵarǵy tehnıkalyq kolledjdi, Soltústik Qazaqstan Memlekettik ýnıversıtetin, sonymen qatar, D.Serikbaev atyndaǵy Shyǵys Qazaqstan Memlekettik tehnıkalyq ýnıversıtetin basqarǵan.
Jıynda oqý ornynyń ardagerleri, akademıkter Sultan Sartaev pen Meıirhan Ábdildın sóz sóıledi.
Óz kezeginde Ǵalymqaıyr Mutanov: «Men oqý orynda bastalǵan modernızatsııany jalǵastyryp, ǵylymı jáne pedagogıkalyq áleýetti oryndy jáne tıimdi qoldaný úshin bar múmkinshilikti jasaımyn», - dedi.
