QR Bilim vıtse-mınıstri Talǵardaǵy mektep dırektorlarymen kezdesti
ALMATY. QazAqparat - QR Bilim jáne ǵylym vıtse-mınıstri Bıbigúl Asylova Almatyǵa jumys sapary barysynda Talǵar qalasyndaǵy mektepte boldy, dep habarlaıdy QazAqparat tilshisi.
Aıta ketý kerek, Talǵardaǵy №5,14,16,49 mektepteri 2013 jyldan beri jan basyna shaqqandaǵy qarjylandyrý júıesine kóshken.
Mınıstrlik ókili mektep dırektorlarynan osy ýaqyt aralyǵynda jetken jetistikter men túıtkildi máseleler jaıly surap bildi.
Pılottyq joba 2013 jyldan beri júzege asyrylyp keledi. Qazirgi tańda Qazaqstanda 73 mektep jan basyna shaqqandaǵy qarjylandyrýǵa kóshken.
Bul joba mektepter arasyndaǵy básekelestikti damytyp, bilim sapasyn arttyrýǵa baǵyttalǵan.
«2020-2021 jyldan bastap eldegi barlyq tolyq komplektili mektepter osy qarjylandyrý júıesine kóshedi. Óıtkeni, bizder ádistemeni tolyq birizdi qylýymyz kerek. Barlyq túıtkildi máseleler bolsa, sheshý joldaryn qarastyrýymyz kerek. Sondyqtan, Talǵar aýdany mektepteriniń ujymymen kezdesý ótkizip jatyrmyz», - dedi vıtse-mınıstr.
Onyń aıtýynsha, qarjylandyrýdyń jańa formatynyń ádistemesi kelesi jyldyń qańtarynda tolyq qabyldanýy tıis.
«Kez kelgen normatıvtiń ádistemesiniń negizinde memlekettik bilim berý standarty jatyr. Bul Qazaqstannyń kez kelgen azamatyna kepildi tegin bilim alýyna múmkindik beredi», - dedi vıtse-mınıstr.
Kezdesýge qatysqan aýdandyq mektep dırektorlary jan basyna shaqqandaǵy qarjylandyrý júıesiniń oń jáne keri tustaryn aıtty.
Kóbinese mektep ókilderi esep berý, ákimshilik jumystaryn júrgizý týraly túsiniktirek aıtylsa degen nıet bildirdi.
Vıtse-mınıstrdiń aıtýynsha, jańa júıe boıynsha ár oqýshyǵa jylyna orta eseppen 212 myń teńge bólinedi.
Bul qarjydan oqytýshylardyń jalaqysy, ákimshilik shyǵyndar, oqý quraldary, kommýnaldy shyǵyndar tólenetin bolady.
