«QR Bilim týraly» zańyna ózgerister men tolyqtyrýlar engizýge qatysty zań jalpy otyrysta qaralatyn boldy
ASTANA. 20 qyrkúıek. QazAqparat /Aıdar Ospanalıev/ - Senat depýtatary «Qazaqstan Respýblıkasynyń bilim týraly» zańyna ózgerister men tolyqtyrýlar engizý týraly» zań jobasyn Senattyń jalpy otyrysynda qaraıtyn boldy. Búgin atalmysh qujatty talqyǵa salǵan Áleýmettik-mádenı damý komıtetiniń músheleri osyndaı baılamǵa keldi.
Jıyn barysynda qujattyń maqsat-mindetterine baılanysty baıandama jasaǵan bilim jáne ǵylym vıtse-mınıstri Mahmetqalı Sarybekovtyń aıtýynsha, talqyǵa usynylyp otyrǵan qujat talaptary boıynsha elimizdiń «Bilim týraly» zańyna aıtarlyqtaı ózgerister engiziledi. «Zańǵa engiziletin ózgerister negizinen ótken jyldyń jeltoqsanynda qabyldanǵan 2011-2020 jyldardy qamtıtyn bilim berýdi damytý memlekettik baǵdarlamasymen baılanysty bolyp otyr. Bul strategııalyq, bilim berý júıesi úshin asa mańyzdy bolyp tabylatyn qujat 2010 jyly Memleket basshysynyń Jarlyǵymen bektilgen. Atalmysh qujattyń negizgi strategııalyq basymdyqtaryn júzege asyrý úshin bizde tıisti normatıvti baza bolǵan joq. Búgin talqylaýǵa usynylyp otyrǵan qujatqa engizilgen ózgerister negizinen osy máselelerdi, ıaǵnı memlekettik baǵdarlamanyń tıisti normatıvti jáne zańnamalyq aktimen qamtamasyz etý máselesin qamtıdy»,-dedi mınıstrdiń orynbasary.
Qujatty jan-jaqty talqylap ony 22 qyrkúıekte ótetin Senattyń jalpy otyrysynda qaraý qajet degen sheshim qabyldady.
