QR Bilim mınıstri: Elimizdiń joǵary oqý oryndary derbestik alatyn bolady
ASTANA. 16 jeltoqsan. QazAqparat - Elimizdiń joǵary oqý oryndary derbestik alatyn bolady. Bul týraly «KTK» telearnasynyń «Halyq qyzmetshisi» baǵdarlamasynda qonaq bolǵan QR Bilim jáne ǵylym mınıstri Aslan Sárinjipov aıtty.
Mınıstrdiń atap ótýinshe, keńestik bilim berý júıesi nátıje bergenimen, ol josparly ekonomıkaǵa negizdelgen bolatyn. Al qazirgi naryqtyq jaǵdaıdaǵy elimizdiń bilim berý júıesi naryq talabyna saı ózgerip, ońtaılandyrylýy tıis.
«Biz kadrlar daıyndaý úshin JOO-lardyń derbestigi týrasynda aıtamyz. Endi JOO-larǵa mınıstrlik joǵarydan qandaı mamandyq daıyndaý kerek ekenin aıtpaıdy. Al eń bastysy - bul baǵdarlama mazmuny. Bolashaq mamandy nege oqytý kerektigin JOO-larǵa óz betterinshe aıqyndaý kerek bolady. Eger damyǵan elderdi alyp qaraıtyn bolsa, onda olarda bul júıe qalyptasqan ári akademııalyq erkin ustanym barynsha myqty qorǵalǵan. Professor ózi isiniń kásibıi retinde óz baǵdarynyń mazmunyn óz erkimen aıqyndaýǵa quqy bar. Ol konferentsııalarǵa qatysyp, ǵylymı jobalar ázirleıdi. Jańa bilimderdi oı eleginen ótkizip, sol bilimdi árbir semestr saıyn óz baǵytynyń mazmunyn baıytýǵa jumsaıdy», - dedi mınıstr.
A.Sárinjipovtiń atap ótýinshe, derbestik engizilgennen keıin árbir JOO óziniń strategııasyna ıe bolyp, resýrstardy tabysty fakýltetterge baǵyttaı alatyn bolady.
«Derbestik elementterin bizdiń JOO júıemizdiń zaman talabyna saı alǵa qadam bastyrý úshin engizý qajet. Bilim berýdi damytý qajet, biz bir orynda turyp qala almaımyz. Biz elý eldiń qataryna kirdik, endi bizderge odan ary jyljyp, otyzdyqtyń qataryna ený qajet. Biz joǵary kóterilgen saıyn básekelestik te kúsheıe beredi. Sondyqtan da bizge damý, jańashyldyq qajet», - dedi ol.
