QR BǴM jyl saıyn JOO-larda bilim alý úshin 35 myńnan astam grant bóledi - A. Sárinjipov

ASTANA. QazAqparat - QR Bilim jáne ǵylym mınıstrligi jyl saıyn JOO-larda bilim alý úshin 35 myńnan astam grant bóledi, bul týraly №64 mektep-lıtseıinde ótken saltanatty jıynda bilim jáne ǵylym mınıstri Aslan Sárinjipov málimdedi.

«Jyl saıyn JOO-larda bilim alý úshin 35 myńnan astam grant bólemiz. Kim joǵary ball alsa, ózi qalaǵan mamandyǵyn tańdaı alady. Sóıtip bilim alýǵa, úlken ómir jolyna joldama alady. Qazir jastardyń bilim, kásip alýy úshin elde keń múmkindikter qarastyrylǵan», - dedi A. Sárinjipov.

Sondaı-aq ol QR BǴM UBT ótkizý qaǵıdasyna engizgen ózgerister jaıly aıtty.

«Bıylǵy jyly qaǵıdaǵa azdaǵan ózgerister engizdik. Onyń UBT ádil ótýine septigi tıedi degen úmittemiz. Attestatqa oqýshy bilim alý kezeńinde alǵan baǵasy men UBT baly arasyndaǵy ortasha baǵa kiredi. Barynsha ádil jol osy dep oılaımyz. Óıtkeni oqýshy «úzdik» oqýy múmkin de, UBT kezinde tolqyp nemese basqa sebepter kedergi bolýy múmkin. Jańa júıe barynsha ádil bolyp, kórsetkishterdi arttyrady degen senimdemiz», - dep málimdedi A. Sárinjipov.

Mınıstr, sondaı-aq, Qazaqstan boıynsha UBT ortalyqtary sanynyń artqanyn atap ótti.

«Tutastaı bıyl UBT ortalyqtarynyń sany artty. Qosymsha 10 pýnkt ashyldy. Barlyǵy 165 ortalyq bar. Kelesi jyly tapsyrý pýnktine deıingi qashyqtyq 100 shaqyrymnan aspaý úshin taǵy da 17 ortalyq ashpaqpyz», - dep sózin aıaqtady A. Sárinjipov.