QR BǴM pedagogterdiń quqyqtaryn buzý týraly júzden astam ótinishti qarady
Bul týraly «Bilim jáne ǵylym – eldiń turaqty damýynyń kepili» taqyrybyndaǵy pedagogterdiń Respýblıkalyq tamyz konferentsııasynyń plenarlyq sessııasynda QR Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.
Mınıstr «Pedagog mártebesi týraly» Zań aıasynda Bilim jáne ǵylym mınıstrligi pedagogterdiń eńbek jaǵdaıyn jaqsartý boıynsha jumys júrgizip jatqanyn atap ótti. Bul saladaǵy qadamdar muǵalimderdi ózge jumystar men tekserýlerden bosatyp, materıaldyq yntalandyrýǵa baǵyttalǵan.
Sapany qamtamasyz etý jáne pedagog quqyqtarynyń buzylýyna jol bermeý maqsatynda bilim sapasy jónindegi aýmaqtyq departamentter turaqty negizde túsindirý jumystaryn júrgizip, kelip túsken ótinishterdi qaraıdy.
«Barlyq óńirde pedagogterdiń quqyqtary boıynsha aýmaqtyq keńester qurylyp, jumys istep jatyr. Jyl basynan beri 116 resmı ótinish kelip tústi. Ótinish boıynsha pedagogterdiń quqyqtaryn buzý faktileri rastaldy. Olardyń kóbi Túrkistan, Jambyl jáne Shyǵys Qazaqstan oblystarynda tirkeldi. Pedagogterdi ózge jumys túrlerine tartý, bilim alýshylar men olardyń ata-analary tarapynan qurmettemeý ári orynsyz minez-qulyq máselelerine qatysty shaǵymdar tústi. Pedagogterdi jóndeý jumystaryna, mektep kabınetterin tazalaýǵa tartý, gazetter men jýrnaldarǵa májbúrlep jazý faktileri anyqtaldy. Rastalǵan faktiler boıynsha kináli adamdar ákimshilik jaýapqa tartyldy», - dedi A. Aımaǵambetov.
Osy oraıda mınıstr pedagog mártebesi óte mańyzdy ekenin, sondaı-aq bul saladaǵy zań buzýshylyqtar aıryqsha tekseriletinin atap ótti.
