QR BǴM muǵalimderdiń biliktilik testinen óte almaı qalýyna qatysty pikir bildirdi
ASTANA. QazAqparat - QR Bilim jáne ǵylym vıtse-mınıstri Ashat Aımaǵambetov biliktilik testi týraly kóńilge kúdik uıalatyp júrgen birqatar saýaldarǵa jaýap berdi, dep habarlaıdy QazAqparat tilshisi.
Onyń aıtýynsha, biliktilik testiniń nátıjesi muǵalimderdiń ózine ǵana aıan.
«Keı muǵalimderdiń biliktilik testinen óte almaı qalýynda qorqatyn eshteńe joq. Bul pedagogtardyń abyroıyna da nuqsan keltirmeıdi. Sebebi, testileý nátıjesi ınternetke júktelgen joq, taqtaıshaǵa ilingen joq, bilim basqarmalaryna jiberilgen joq.. Ár pedagog óz nátıjesi týraly ǵana biledi, sebebi bul ár muǵalimniń jeke máselesi», - dedi vıtse-mınıstr «Nur Otan» partııasynda ótken «Bilim berý júıesinde aǵylshyn tilin oqytýǵa kezeń-kezeńmen kóshý máseleleri»otyrysynda.
Sondaı-aq, biliktilik testinen ótken pedagogtar qazir ekinshi kezeńnen ótip jatyr jáne 1 qyrkúıekten bastap, joǵary jalaqy ala alady.
«Muǵalimderdiń kópshiligi pánder boıynsha suraqtardyń qıynǵa soqqanyn aıtýda, biraq, suraqtardyń barlyǵy mektep baǵdarlamasynan alyndy jáne aıtarlyqtaı qıyn bolǵan joq. Muǵalimderdiń 60% testileýden ótti, bul óte jaqsy kórsetkish. (...) Tań qalarlyǵy, jyl saıyn bul testini jyl saıyn 15 myń ǵana pedagog tapsyratyn. Al 2018 jyly 69 myń muǵalim ótinim berdi, buǵan sanat boıynsha ústemeaqynyń kóterilýi yqpal etken shyǵar. Árıne, bizde bilikti kásibı pedagogtar kóp, belgilengen mejeden óte almaı qalǵandar da qarasha aıynda qaıta synaq tapsyra alady. Ol testiden oıdaǵydaı ótse, 2019 jyldyń qańtar aıynan bastap ústemeaqy ala alady», - dedi ol.
Sondaı-aq, vıtse-mınıstr muǵalimder eńbekaqysy jergilikti bıýdjet esebinen tólenetinin, al ústemeaqylardyń respýblıkalyq bıýdjetten maqsatty túrde bólingenin atap ótti.
