QR BǴM mektep syrtyndaǵy ájethanalardy joıa bastady
NUR-SULTAN. QazAqparat – QR Bilim jáne ǵylym mınıstri Ashat Aımaǵambetov mekteptegi ájethana máselesine qatysty tilshilerdiń suraǵyna jaýap berdi, dep habarlaıdy QazAqparat tilshisi.
«Syrttaǵy ájethanalardyń bárin joıý mindeti tur. Qarajat jergilikti bıýdjetten bólinedi. Beınebaqylaý kameralary boıynsha da – jalpy qaýipsizdikti qamtamasyz etý turǵysynan tıisti jumys júrgizilip jatyr. Úkimet tapsyrma berdi. Bul jumysty aıaqtaımyz degen oıdamyn», - dep jaýap berdi mınıstr Úkimet otyrysynan keıin tilshilerdiń qoıǵan suraǵyna.
Ashat Aımaǵambetov sonymen birge atalmysh máseleni sheshý boıynsha qarajattyń qaıdan bólinetinin atap ótti.
«Qarajat kólemi ár óńirde ártúrli. Sebebi, smeta baǵasyn ázirleý kerek. Jumys toptary qazir tıisti jumysty qolǵa alyp, bul baǵytta qansha qarajattyń kerektigin sanap jatyr. Keıbir mektepke qosymsha sý skvajınasy kerek, keıbirine káriz tartý qajet. Bul keshendi másele. Qansha mektepke qajetti jumys jasalatyny belgili. 2300 mektepke jóndeý júrgizý kerek bolady. Qazir iske kirisip kettik», - dedi ol.
Buǵan deıin Tarazda 12 jastaǵy oqýshy qyzdy 38 jastaǵy erkek mekteptiń syrttaǵy ájethanasynda zorlaǵany týraly jazǵan bolatynbyz.
Osy shýly oqıǵa qoǵamda rezonans týǵyzyp, mektep ájethanalaryn syrttan ishke kirgizý jumysy qolǵa alynyp jatyr.
